2020: రిటైర్మెంట్​ ప్రకటించిన క్రికెటర్స్​ వీరే!

రిటైర్మెంట్​.. ప్రతి ఆటగాడి జీవితంలో ఏదో ఓ రోజు తప్పక వస్తుంది. ఆ రోజు అతడు మైదానాన్ని వీడక తప్పదు. తాను ఆటకు దూరమైనా.. కెరీర్​లో తన పేరిట లిఖించుకున్న గణాంకాలు మాత్రం చిరకాలం అలానే ఉండిపోతాయి. ప్రతి ఏడాది ఎవరో ఓ క్రికెటర్​ తమ ఆటకు వీడ్కోలు పలుకుతూనే ఉంటారు. అలాగే ఈ ఏడాది కొంతమంది గొప్ప ఆటగాళ్లు తమ కెరీర్​కు గుడ్​బై చెప్పారు. వారెవరు? వారు సాధించిన ఘనతలు ఏంటి? వంటి విషయాల సమాహారమే ఈ కథనం.

అప్పటివరకు సిక్సర్లు, బౌండరీలతో విరుచుకుపడి, వైవిధ్యమైన బౌలింగ్​తో ఆకట్టుకుని, స్టన్నింగ్​ క్యాచులతో అదరగొట్టిన క్రికెటర్లు.. అకస్మాత్తుగా క్రికెట్​కు వీడ్కోలు పలికారంటే ఏ అభిమానికి మాత్రం బాధలేకుండా ఉంటుంది. తమ అభిమాన ఆటగాడు మైదానంలో దుమ్మురేపుతున్నప్పుడు వచ్చే ఆనందం, కేరింతలు, ఈలలు అన్ని మూగబోతాయి. మొత్తానికి రిటైర్మెంట్​ ప్రకటించడమంటే ఓ ఆటగాడికి తన జీవితంలోనే అతి పెద్ద సవాల్ లాంటిది. అయినా ప్రతి ఏడాది ఎవరో ఒక క్రికెటర్ ఆటకు గుడ్​బై చెప్తూనే ఉంటారు. అలానే ఈ ఏడాది కూడా చాలా మంది గొప్ప ఆటగాళ్లు క్రికెట్​కు వీడ్కోలు పలికారు. మరి వారెవరో ఓసారి చూద్దాం.

ధోనీ

మహేంద్ర సింగ్​ ధోనీ.. క్రికెట్ ప్రపంచంలో విజయవంతమైన సారథుల్లో ఒకడు. తన కెప్టెన్సీలో మూడు ప్రపంచకప్​ల్లోనూ భారత్​ను విజేతగా నిలిపాడు. ఎప్పుడూ ప్రశాంత స్వభావంతో మెలిగే మహీ.. తన రిటైర్మెంట్​ను కూడా ఆగస్టు 15వ తేదీన చాలా సింపుల్​గా ఓ చిన్న సందేశం ద్వారా తెలిపి అందరినీ షాక్​కు గురిచేశాడు. మొత్తంగా కెరీర్​లో 350 వన్డేలు(10,073 పరుగులు), 90టెస్టులు(4876 పరుగులు), 98టీ20(1617 పరుగులు) ఆడాడు.

ధోనీ

సురేశ్​ రైనా

సురేశ్​ రైనా కూడా ధోనీ రిటైర్మెంట్​ ప్రకటించిన రోజే ఆటకు వీడ్కోలు పలికాడు. కెరీర్​లో 18 టెస్టులు, 226 వన్డేలు, 78 టీ20లు ఆడి.. 7988 పరుగులు చేశాడు. మరోవైపు ఐపీఎల్​లో చెన్నై సూపర్​ కింగ్స్​కు ప్రాతినిధ్యం వహిస్తున్న అతడు.. లీగ్​ చరిత్రలో అత్యధిక పరుగులు చేసిన ఆటగాళ్ల జాబితాలో కొనసాగుతున్నాడు.

రైనా

ఇర్ఫాన్​ పఠాన్​

కెరీర్​లో ఎన్నో గాయాలు, నిలకడలేమి, టీమ్​ మేనేజ్​మెంట్​ నుంచి ప్రోత్సాహం కరవు ఇలా ఎన్నో సమస్యల నడుమ అర్ధాంతరంగా తన కెరీర్​ను ఈ ఏడాది ముగించాడు ఇర్ఫాన్​ పఠాన్​. గంగూలీ, ద్రవిడ్​, వీవీఎస్​ లక్ష్మణ్​తో కలిసి డ్రెస్సింగ్​ రూమ్​ను పంచుకోవడం తన అదృష్టమని చెప్పాడు. కెరీర్​లో 29 టెస్టులు(100 వికెట్లు), 120వన్డేలు(173 వికెట్లు), 24టీ20(28 వికెట్లు)ఆడాడు. టెస్టుల్లో హ్యాట్రిక్ సాధించిన రెండో ఆటగాడిగా రికార్డుకెక్కాడు. ​

ఇర్ఫాన్​ పఠాన్​

ఇయాన్​ బెల్​

ఇంగ్లాండ్​ స్టార్​ క్రికెటర్​ ఇయాన్​ బెల్​.. కెరీర్​లో 118టెస్టులు(7727 పరుగులు), 161 వన్డేలు(5416పరుగులు) ఆడాడు. ఏడు యాషెస్​ సిరీస్​లో పాల్గొన్న ఇతడు ఐదు యాషెస్​ సిరీస్​ విజయాల్లో కీలక పాత్ర పోషించాడు. "జరగాల్సిన సమయంలో ఏది జరగాలో అదే జరుగుతుంది. దురదృష్టమేంటంటే ఇది నా సమయం. నేనెప్పుడు ఆటను ప్రేమిస్తూనే ఉంటా. ప్రస్తుతం నా శరీరం నేను ఆశించిన స్థాయిలో ప్రదర్శన చేయలేకపోతుంది. అందుకే రిటైర్మెంట్​ ప్రకటిస్తున్నా" అని వీడ్కోలు పలికేటప్పడు ఈ మాట చెప్పాడు ఇయాన్​.

ఇయాన్​ బెల్​

మహ్మద్​ ఆమిర్​

పాకిస్థాన్​ పేసర్​ మహ్మద్​ ఆమిర్.. 28ఏళ్ల వయసులోనే రిటైర్మెంట్​ ప్రకటించి అందరినీ షాక్​కు గురిచేశాడు. పాకిస్థాన్​ బోర్డు తీరుపై అసంతృప్తి వ్యక్తం చేస్తూ ఆటకు వీడ్కోలు పలికాడు. కెరీర్​లో 36 టెస్టులు, 61 వన్డేలు, 50టీ20 ఆడగా.. 259 వికెట్లు పడగొట్టాడు ఆమిర్​.

మహ్మద్​ ఆమిర్​

శామ్యూల్​

వెస్టిండీస్​ క్రికెటర్​ మార్లన్​ శామ్యూల్.. ఎన్నో​ విజయాల్లో కీలక పాత్ర పోషించాడు. ​చివరిసారిగా 2018 డిసెంబరులో విండీస్ తరఫున ఆడాడు. కెరీర్​లో 71 టెస్టులు, 207వన్డేలు, 67 టీ20లు ఆడగా.. 11, 134పరుగులు చేశాడు. అందులో 17 సెంచరీలు ఉండగా.. 152 వికెట్లు తీశాడు.

మార్లన్​ శామ్యూల్స్​

వసీం జాఫర్​

రంజీ ట్రోఫీలో అత్యధిక పరుగులు, సెంచరీలు చేసిన ఆటగాడిగా పేరు లిఖించుకున్నాడు టీమ్​ఇండియా క్రికెటర్​ వసీం జాఫర్​.. ఈ ఏడాది మార్చిలో అన్ని ఫార్మాట్లకు వీడ్కోలు పలికాడు. కెరీర్​లో 31 టెస్టులు ఆడి 1,944 పరుగులు చేశాడు. "రిటైర్మెంట్​ ప్రకటించడానికి సరైన సమయం వచ్చింది. నా కెరీర్​ తొలి ఇన్నింగ్స్​లో ఎర్రబంతి ఫార్మాట్​ను ఎంతగానో ప్రేమించా. కోచ్​ లేదా కామెంటేటర్​గా నా రెండో ఇన్నింగ్స్​ ప్రారంభిద్దామనుకుంటున్నా" అని జాఫర్​ అన్నాడు.

వసీం జాఫర్​

పార్థివ్​ పటేల్​

17 ఏళ్ల వయసులో 2002 జనవరి 4న న్యూజిలాండ్​పై వన్డేతో పార్థివ్ భారత్​ తరఫున అరంగేట్రం చేశాడు. 2012 ఫిబ్రవరి 21న ఇంగ్లాండ్​ వన్డే చివరగా ఆడాడు. 2002 ఆగస్టు 8న తొలి టెస్టు, 2018 జనవరి 24న చివరి టెస్టులో పాల్గొన్నాడు. భారత్​ తరఫున రెండు అంతర్జాతీయ టీ20లు, గుజరాత్​ తరఫున 194 ఫస్ట్​క్లాస్ మ్యాచ్​లు ఆడాడు. ఐపీఎల్​లోనూ చెన్నై, బెంగళూరు జట్లకు ప్రాతినిధ్యం వహించాడు. పదేళ్ల కెరీర్​లో 38 వన్డేలు, 25 టెస్టులాడి వరుసగా 736, 934 పరుగులు చేశాడు. ఇందులో 10 అర్ధశతకాలు ఉన్నాయి. అయితే అంతర్జాతీయ కెరీర్​లో​ ఒక్క సెంచరీ కూడా చేయలేకపోయాడు పార్థివ్.

పార్థివ్​ పటేల్​

ఓజా

2008లో అరంగేట్రం చేసిన లెఫ్టార్మ్ స్పిన్నర్ ఓజా.. 2013 వరకు అంతర్జాతీయ మ్యాచ్​ల్లో భారత్​కు ప్రాతినిధ్యం వహించాడు. మొత్తంగా 24 టెస్టులు, 18 వన్డేలు, 8 టీ20లు ఆడాడు. టెస్టులో 113 వికెట్లు తీశాడు. దేశవాళీల్లో హైదరాబాద్​కు, ఐపీఎల్​లో దక్కన్ ఛార్జర్స్, ముంబయి ఇండియన్స్​కు ఆడాడు. 2018లో బిహార్​ తరఫున చివరి ఫస్ట్​క్లాస్ మ్యాచ్​లో పాల్గొన్నాడు. ప్రస్తుతం వ్యాఖ్యాతగా వ్యవహరిస్తున్నాడు.

ఓజా

షేన్​ వాట్సన్​

2016లో అంతర్జాతీయ క్రికెట్​కు వీడ్కోలు పలికిన వాట్సన్​.. కెరీర్​లో 59 టెస్టులు, 190 వన్డేలు, 58 టీ20లు ఆడి.. మొత్తంగా 14 వేల పరుగులు చేశాడు. ఐపీఎల్​లో రాజస్థాన్​ రాయల్స్​, రాయల్​ ఛాలెంజర్స్​ బెంగళూరు, చెన్నై సూపర్​ కింగ్స్​ తరఫున మొత్తంగా 145 మ్యాచులు ఆడాడు. వాట్సన్​. 2008, 2018లో ట్రోఫీని సొంతం చేసుకున్న రాయల్స్​, చెన్నై జట్టు విజయాల్లో కీలక పాత్ర పోషించాడు. 2008, 2013లో మ్యాన్​ ఆఫ్​ ది టోర్న్​మెంట్​ అవార్డును అందుకున్నాడు. మొత్తంగా లీగ్​ చరిత్రలో 137.91 స్ట్రైక్​ రేట్​తో 3,874 పరుగులు చేశాడు.

షేన్​ వాట్సన్​

2020: క్రికెట్​ను వీడినా.. అభిమానుల మదిని దోచారు

ఇదీ చూడండి : 2020 రౌండప్: లోకాన్ని విడిచి.. మదిలో నిలిచి!