'మహిళల క్రికెట్​ను కరోనా రెండేళ్లు వెనక్కి నెట్టింది'

కరోనా కారణంగా విధించిన లాక్​డౌన్ ప్రభావం భారత మహిళల క్రికెట్​పై తీవ్ర ప్రభావం చూపిందని వన్డే జట్టు కెప్టెన్​ మిథాలీరాజ్​ తెలిపింది. ఈ మహమ్మారి వల్ల మహిళల క్రికెట్​ ఎదుగుదల రెండేళ్లు వెనక్కి వెళ్లినట్లు అనిపిస్తోందని పేర్కొంది.

కరోనా కారణంగా లభించిన ఈ విరామం భారత మహిళల క్రికెట్​ ఎదుగుదలను కనీసం రెండేళ్లు వెనక్కి లాగిందని అమ్మాయిల వన్డే జట్టు కెప్టెన్​ మిథాలీరాజ్​ తెలిపింది. ఇటీవలే ఓ వెబినార్​లో మాట్లాడిన ఆమె.. తన అభిప్రాయాలను పంచుకుంది.

''కరోనా మహమ్మారి వల్ల దురదృష్టవశాత్తు మహిళల క్రికెట్​ రెండేళ్లు వెనక్కి వెళ్లిపోయినట్లుగా కనిపిస్తోంది. 2017 వన్డే ప్రపంచకప్​, 2020 టీ20 ప్రపంచకప్​లో భారత అమ్మాయిల జట్టు అద్భుత ప్రదర్శన తాలూకు ప్రభావం మరుగున పడిపోయింది. ఏదేమైనా మహిళల జట్టు కోసం క్యాలెండర్​ రూపొందించాలని బీసీసీఐతో చర్చించాం. అలాగైనా అభిమానులు జట్టు ఆడే మ్యాచ్​లను అనుసరించే వీలుంది. వైరస్​ కారణంగా ప్రణాళికలన్నీ తలకిందులయ్యాయి. వాటిని తిరిగి రూపొందించుకుంటామనే నమ్మకం ఉంది. పూర్తి స్థాయి మహిళల ఐపీఎల్​ జరగాలంటే మరో రెండు, మూడేళ్లు పడుతుందని అనుకుంటున్నా. వచ్చే ఐపీఎల్​ సీజన్​తో పాటు నిర్వహించాల్సిన మహిళల ఛాలెంజ్​ టోర్నీలో పాల్గొనేందుకు నాలుగో జట్టు కోసం చూస్తున్నాం.''

- మిథాలీరాజ్​, టీమిండియా మహిళల వన్డే జట్టు కెప్టెన్​

వ్యాపార సంస్థలు కనీసం ఒక్క భారత క్రీడనైనా దత్తత తీసుకోవాలని, ప్రసారదార్లు వాటికి ప్రచారం కల్పించేందుకు సమయం కేటాయించాలని.. ఇదే వెబినార్​లో మాట్లాడిన భారత ఒలింపిక్​ సంఘం అధ్యక్షుడు నరిందర్​ బత్రా పేర్కొన్నాడు.

ఇదీ చూడండి:'మహిళా ఐపీఎల్​ను బీసీసీఐ వచ్చే ఏడాది ప్రారంభించాలి'