గోల్డెన్​ హ్యాండ్​: పాండే ఉంటే ప్రత్యర్థికి పరాజయమే..

భారత క్రికెట్​ జట్టులో ఆటగాళ్ల ప్రతిభకు కొదువలేదు. న్యూజిలాండ్​తో జరిగిన టీ20 సిరీస్​లో యువ క్రికెటర్లు ఒత్తిడి సమయంలోనూ అద్భుతంగా రాణించారు. అయితే టీమిండియాలో మనీశ్​ పాండే మాత్రం లక్కీఛార్మ్​గా మారాడు. ఎందుకంటే అతడు ఆడిన 19 టీ20ల్లో భారత్​ ఎప్పుడూ ఓడిపోకపోవడం విశేషం.

భారత టీ20 జట్టులో మనీశ్ పాండేకి గత రెండేళ్లుగా చాలా తక్కువ అవకాశాలు వస్తున్నాడు. మైదానంలో చాలా వేగంగా కదిలే ఈ ఆటగాడు.. ప్రత్యర్థికి బ్యాట్​తోనూ సమాధానం చెప్పగలడు. తాజాగా న్యూజిలాండ్​తో సిరీస్​లోనూ ఈ విషయాన్ని నిరూపించుకున్నాడు. నాలుగో టీ20లో టాప్​ ఆర్డర్​ విఫలమైనప్పుడు అర్ధశతకంతో రాణించాడు. అయితే ఇతడు భారత టీ20 జట్టుకు లక్కీ ఛార్మ్​గా మారాడు. ఎందుకంటే గత రెండేళ్లలో ఇతడు తుది జట్టులో బరిలోకి దిగిన టీ20ల్లో భారత్​కు ఓటమే లేదు.

మనీశ్​ పాండే

న్యూజిలాండ్​పై ఐదు టీ20ల సరీస్​ క్లీన్​ స్వీప్​ చేసిన టీమిండియా... తొలసారి కివీస్​ గడ్డపై పొట్టి ఫార్మాట్​ టైటిల్​ అందుకుంది. అయితే ఇందులో మనీశ్​ పాత్ర కీలకంగా ఉంది. కీలక సమయంలో అద్భుతమైన క్యాచ్​లతో మ్యాచ్​ ఫలితాన్ని మార్చేశాడు. 2018 నుంచి న్యూజిలాండ్‌తో ఐదో టీ20 వరకూ భారత్ తరఫున మనీశ్ పాండే 19 అంతర్జాతీయ టీ20 మ్యాచ్‌లాడగా.. అన్నింటిలోనూ టీమిండియానే గెలుపొందింది. అంతేకాకుండా చివరి ఏడు టీ20ల్లోనూ మనీశ్​ నాటౌట్‌గా నిలవడం విశేషం.