రిటైర్​ అయ్యేలోపు అన్ని సెంచరీలు చేస్తా: గేల్

తాను మరో పది శతకాలు చేసిన తర్వాతే ఆటకు వీడ్కోలు చెబుతానని ట్విట్టర్​ వేదికగా స్పష్టం చేశాడు విధ్వంసక క్రికెటర్ క్రిస్ గేల్.

40 ఏళ్లు.. క్రికెట్​లో ఈ వయసు వచ్చేటప్పటికి అందరూ ఆటకు వీడ్కోలు పలికేస్తారు. వెస్టిండీస్​ విధ్వంసక క్రికెటర్ క్రిస్ గేల్ మాత్రం బ్యాట్​తో ఇంకా అదరగొడుతున్నాడు. ప్రపంచంలోని వివిధ లీగ్​ల్లో ఆడుతూ పలు రికార్డులు నమోదు చేస్తున్నాడు. ఇప్పటికే టీ20ల్లో చాలా ఘనతలు ఇతడి పేరుమీదే ఉన్నాయి.

గతంలో రిటైర్మెంట్​ ప్రకటించి, మళ్లీ వెనక్కు తీసుకున్న గేల్... ప్రస్తుతం టీ20ల్లో 22 శతకాలు చేశాడు. ఈ విషయాన్ని ట్విట్టర్​లో ఓ వైబ్​సైట్ పోస్ట్ చేయగా, '10 మోర్ టూ కమ్'(ఇంకో పది చేస్తాను) అని రీట్వీట్ చేశాడు. అంటే మరో పది సెంచరీలు చేసిన తర్వాతే రిటైర్మెంట్​ తీసుకుంటానని స్పష్టం చేశాడు.

టీ20ల్లో ఇప్పటివరకు 13,296 పరుగులు చేసి ఎవరికీ అందనంత ఎత్తులో ఉన్నాడు గేల్. ఇందులో 22 సెంచరీలతో పాటు 82 అర్ధసెంచరీలు ఉన్నాయి. విండీస్​ తరఫున టీ20ల్లో 2 సెంచరీలతో సహా 13 హాఫ్ సెంచరీలు చేశాడు. ఏప్రిల్ 15 నుంచి ప్రారంభమయ్యే ఐపీఎల్​లో పంజాబ్​కు ఆడనున్నాడు.

కింగ్స్ ఎలెవన్ పంజాబ్ జెర్సీలో క్రిస్ గేల్