క్రిస్ గేల్ బంగారు ఉంగరంపైనా అదే సంఖ్య

తన కొత్త బంగారు ఉంగరాన్ని డిఫరెంట్​గా డిజైన్​ చేయించాడు విండీస్ విధ్వంసకారుడు క్రిస్ గేల్. ఇందుకు సంబంధించిన ఫొటోలను ఇన్​స్టాలో పోస్ట్ చేశాడు.

యూనివర్స్ బాస్ క్రిస్ గేల్​.. మైదానంలో ఎప్పుడూ చురుగ్గా ఉంటాడు. ప్రపంచంలో ఇప్పటివరకూ జరిగిన ప్రతిలీగ్​నూ దాదాపు పాల్గొన్న ఈ క్రికెటర్.. వచ్చే నెల నుంచి మొదలయ్యే ఐపీఎల్​ కొత్త సీజన్​ కోసం సిద్ధమవుతున్నాడు. ఇందులో ఓ సరికొత్త వస్తువుతో కనిపించనున్నాడు. అదే ఓ బంగారు ఉంగరం.

దీని ప్రత్యేకత ఏంటంటే.. ఈ ఉంగరంపై క్రిస్ గేల్ బొమ్మతో పాటు, చుట్టూ యూనివర్స్ బాస్ అని రాసి ఉంటుంది. ఉంగరం అడుగు భాగంలో గేల్ ఆటోగ్రాఫ్​.. పక్కన 333 అనే సంఖ్య ఉంది. టెస్టుల్లో ఇతడి అత్యధిక వ్యక్తిగత స్కోరు 333 పరుగులు. అందుకే జెర్సీపైనా ఈ నెంబరునే వేయించుకున్నాడు.

ఐపీఎల్​లో ప్రస్తుతం పంజాబ్​ తరఫున ఆడుతున్న గేల్.. ఈ టోర్నీలో ఇప్పటి వరకూ 125 మ్యాచ్‌లు ఆడాడు. 4,484 పరుగులు చేశాడు. ఇందులో ఆరు సెంచరీలు ఉన్నాయి. అత్యధిక వ్యక్తిగత స్కోరు 175 పరుగులు.