'ఇంగ్లాండ్​ బలహీనతను భారత్ సొమ్ము చేసుకుంది'​

ఇంగ్లాండ్​ బ్యాట్స్​మెన్ల స్పిన్ బలహీనతను భారత్​ అనుకూలంగా మలుచుకుందని ఆసీస్​ మాజీ కెప్టెన్ ఇయాన్ ఛాపెల్ అభిప్రాయపడ్డాడు. బంతి అతిగా తిరగకున్నా.. స్పిన్​ అంటే ఉన్న భయం వల్లే ఇంగ్లాండ్​ డిఫెన్స్​లో పడిందని తెలిపాడు. ​

ఇంగ్లాండ్​ బ్యాట్స్​మెన్ల బలహీనతను భారత్ సరిగానే అంచనా వేసిందని ​ఆస్ట్రేలియా మాజీ కెప్టెన్ ఇయాన్​ ఛాపెల్ తెలిపాడు. స్పిన్​ భయాలను టీమ్ఇండియా తమకు అనుకూలంగా మలుచుకుందని పేర్కొన్నాడు.

అహ్మదాబాద్​ వేదికగా జరిగిన పింక్​ టెస్టులో భారత్​ పది వికెట్ల తేడాతో విజయం సాధించింది. స్పిన్నర్లు అక్షర్​ పటేల్ 11​, రవిచంద్రన్ అశ్విన్​ 7 వికెట్లతో సత్తా చాటారు. ఫలితంగా నాలుగు మ్యాచ్​ల టెస్టు సిరీస్​లో కోహ్లీ సేన​ 2-1 ఆధిక్యంలోకి వెళ్లింది.

" పింక్ టెస్టు​ అనంతరం మ్యాచ్​ గురించి మాట్లాడిన కోహ్లీ.. 'వింతగా' అనిపించిందని తెలిపాడు. స్పిన్నర్లను ఎదుర్కోవడంలో విఫలమైన ఇంగ్లాండ్​ బ్యాట్స్​మెన్లకు ఈ పదం సరిగ్గా సరిపోతుంది. స్పిన్​ను ఆడటంలో జో రూట్​ మినహా ఇంగ్లాండ్​ జట్టంతా విఫలమైన విషయాన్ని రెండో టెస్టులోనే టీమ్​ఇండియా గమనించింది. అందుకే మూడో టెస్టులో ముగ్గురు స్పిన్నర్లతో బరిలోకి దిగింది. ఇంగ్లాండ్​ బ్యాట్స్​మెన్ల అసమర్థతను సరిగ్గా గ్రహించిన భారత్​.. అవకాశాన్ని తమకు అనుకూలంగా మలుచుకుంది."

-ఇయాన్​ ఛాపెల్, ఆస్ట్రేలియా మాజీ కెప్టెన్.

"ఇంగ్లాండ్​ ఆటగాళ్లు టీమ్​ఇండియా స్పిన్​ ఉచ్చులో చిక్కుకుపోయారు. వికెట్లకు నేరుగా వేసిన బంతులకే వికెట్లు పడ్డాయి. అందుకు జానీ బెయిర్​ స్టో ఔటైన విధానమే ఒక ఉదహరణ. ఈ వికెట్​పై బంతి అతిగా తిరగలేదు. స్పిన్​​కు వారు ఎక్కువగా కంగారుపడ్డారు. వారి డిఫెన్స్​నూ వారు నమ్మలేదు. రివర్స్​ స్వీప్​ మాత్రమే ఆడటానికి వారు ప్రాధాన్యత ఇచ్చారు" అని ఛాపెల్​ పేర్కొన్నాడు.

స్పిన్​ను ఎదుర్కోవాలంటే ఆటగాళ్లకు ఫుట్​వర్క్​ బాగా ఉండాలని ఛాపెల్​ తెలిపాడు. ఈ నైపుణ్యం ఇంగ్లాండ్​ ఆటగాళ్లలో ఒక్క ఒల్లీ పోప్​ మాత్రమే గ్రహించాడు. కానీ, దాని అమలులో విఫలమయ్యాడని పేర్కొన్నాడు. 'మూడు అంగుళాల దూరంలో ఉండి స్టంపౌట్​ కావొచ్చేమో కానీ మూడు ఇంచుల దూరం తేడాతో ఔట్​ అవ్వొద్దు'.. 'క్రీజు వదిలి ముందుకు పోయినప్పుడు కీపర్​ గురించి ఆలోచించవద్దని' ఛాపెల్​ సూచించాడు.

ఇదీ చదవండి:డబ్ల్యూటీసీలో భారత్​ ఫైనల్​ చేరితే ఆసియా కప్​ వాయిదా!