జనవరి వరకు నన్నేం అడగొద్దు: ధోనీ

2007, 2011 ప్రపంచకప్ విజయానంతరం జరిగిన సంఘటనలు తను ఎప్పటికీ మర్చిపోలేనని అన్నాడు మహేంద్రసింగ్ ధోనీ. ఈ రెండు ఘటనలు మధుర స్మృతులుగా మిగిలిపోతాయని చెప్పాడు. అదే విధంగా జనవరి వరకు రీఎంట్రీ గురించి అడగొద్దని చెప్పాడు.

టీమిండియా మిస్టర్​కూల్ మహేంద్రసింగ్ ధోనీకి 15ఏళ్ల అంతర్జాతీయ క్రికెట్​లో ఎన్నో మధుర స్మృతులున్నాయట. ముఖ్యంగా వాటిలో రెండు జ్ఞాపకాలను ఎప్పటికీ మర్చిపోలేనని అంటున్నాడు మహీ. తొలిసారి తన సారథ్యంలో 2007 టీ20 ప్రపంచకప్​ తర్వాత జరిగిన ఘటన ఒకటి కాగా.. 2011లో భారత్ విశ్వవిజేతగా నిలిచిన సందర్భం రెండోదని చెప్పాడు ధోనీ.

వారి కళ్లల్లో ఆనందం చూశా: ధోనీ

2007 ప్రపంచకప్​ గెలిచిన అనంతరం మేము భారత్​కు తిరిగొచ్చాం. బస్సులో ముంబయిలో మెరైన్ డ్రైవ్​ మీదుగా ప్రయాణిస్తున్నాం. మొత్తం రొడ్డంతా ట్రాఫిక్ జామ్​ అయింది. ఎంతో మంది మమ్మల్ని చూసేందుకు అక్కడికి వచ్చారు. వాళ్లల్లో ముఖ్యమైన పనిమీద వెళ్లే వారుంటారు. వివాహ వేడుకల వేళ్లేవారుంటారు, కొంతమందికి ఫ్లైట్ మిస్సయి ఉంటుంది. కానీ ప్రతి ఒక్కరి కళ్లల్లో ఆనందం. చాలా హ్యాపీగా ఫీలయ్యాను. ఇప్పటికీ ఆ సంఘటన కళ్ల ముందే మెదులుతూనే ఉంది.

అందరి నోట ఒకటే మాట..

2011 ప్రపంచకప్ ఫైనల్ మ్యాచ్​లో రెండో సంఘటన జరిగింది. విజయానికి ఇంకా 15-20 పరుగులు చేయాల్సి ఉంది. వాంఖడే మైదానంలో ఒకటే మాట వినిపిస్తోంది. 'వందేమాతరం' అంటూ స్టేడియమంతా ప్రతిధ్వనించేలా అరిచారు. ఆ ఘటన నా హృదయానికి హత్తుకుంది.ఈ రెండు సంఘటనలు ఎప్పటికీ మర్చిపోలేను.

ఇంగ్లాండ్‌లో జరిగిన ప్రపంచకప్‌ తర్వాత మహీ అంతర్జాతీయ క్రికెట్‌ నుంచి నిరవధిక విరామం తీసుకున్నాడు. రెండు నెలలు సైన్యంలో చేరాడు. ఆ తర్వాత ఇంటి వద్దకు వచ్చేసినా జట్టుకు మాత్రం అందుబాటులో ఉండటం లేదు. ఈ విషయంపై ప్రశ్నించగా ‘జనవరి వరకు నన్నేమీ అడగొద్దు’ అని స్పష్టంగా చెప్పాడు.

ఇదీ చదవండి: తొలి టీ20 హైదరాబాద్​లో.. చివరిది ముంబయిలో