సచిన్‌ జట్టుకు ప్రత్యర్థిగా యువరాజ్​ సింగ్​!

ఆస్ట్రేలియా కార్చిచ్చు బాధితుల సహాయార్థం ఆదివారం సిడ్నీ క్రికెట్‌ మైదానంలో ఛారిటీ క్రికెట్‌ మ్యాచ్‌ జరగనుంది. ఇందులో సచిన్‌ తెందుల్కర్‌ కోచ్‌గా ఉన్న పాంటింగ్‌ ఎలెవన్‌ జట్టు గిల్‌క్రిస్ట్‌ ఎలెవన్‌తో తలపడనుంది. అయితే మాస్టర్​ బ్లాస్టర్​ జట్టుకు ప్రత్యర్థిగా తలపడనున్నాడు మరో భారత మాజీ ఆటగాడు యువరాజ్​ సింగ్​.

ఆస్ట్రేలియాలో కార్చిచ్చు బాధితుల సహాయార్ధం 'బుష్​ఫైర్​ క్రికెట్​ బాష్​' పేరిట ఓ ఛారిటీ మ్యాచ్​ నిర్వహిస్తోంది ఆసీస్​ బోర్డు. సిడ్నీ వేదికగా జరగాల్సిన ఈ మ్యాచ్​ తొలుత శనివారం నిర్వహించాలనుకున్నారు. కానీ వాతావరణ పరిస్థితుల దృష్ట్యా మెల్​బోర్న్​కు మార్చి.. ఆదివారానికి ఆటను వాయిదా వేశారు. ఇందులో పాంటింగ్​ జట్టుకు సచిన్​ కోచ్​గా వ్యవహరిస్తున్నాడు.

ఒకవైపు బ్యాటింగ్​కు 10 ఓవర్లు ఇవ్వనున్నారు. ఇందులో 5 ఓవర్లు పవర్​ ప్లే ఉంటుంది. బౌలర్లకు ఓవర్​ లిమిట్​ లేదు. బ్యాట్స్​మన్​ తొలి బంతికే ఔటైతే దాన్ని పరిగణలోకి తీసుకోరు. ఫీల్డింగ్​లో జట్టులోని ఎవరితోనైనా మార్పులు చేసుకోవచ్చు. మ్యాచ్​ తేదీ మార్పు వల్ల మైఖేల్​ క్లార్క్​, బ్యాట్స్​మన్​ మైఖేల్​ హస్సీ సహా పలువురు మహిళా క్రీడాకారిణులు మ్యాచ్​ నుంచి తప్పుకున్నారు.

పాంటింగ్​, గిల్​క్రిస్ట్​

సభ్యులు వీళ్లే...

పాంటింగ్‌ ఎలెవన్‌లో బ్రయాన్‌లారా, వసీం అక్రమ్‌, జస్టిన్‌ లాంగర్‌, మాథ్యూ హేడెన్‌ లాంటి స్టార్లు ఆడుతున్నారు. ఈ జట్టులో మహిళా క్రికెటర్‌ ఎలిస్‌ విలాని కూడా ఉండనుంది.

మొదట గిల్లీ ఎలెవన్‌కు షేన్‌వార్న్‌ కెప్టెన్‌ అనుకున్నా.. అతని స్థానంలో గిల్‌క్రిస్ట్‌కు బాధ్యతలు అప్పగించారు. ఈ జట్టులో యువరాజ్‌సింగ్‌, వాట్సన్‌, హాడ్జ్‌, సైమండ్స్‌, కోట్నీ వాల్ష్‌ తదితరులు ఆడనున్నారు.

దిగ్గజాలతో 16 ఏళ్ల అమ్మాయి..

ఈ మ్యాచ్​లో దిగ్గజాలతో 16 ఏళ్ల అమ్మాయి బరిలోకి దిగుతోంది. బిగ్​బాష్​ లీగ్​లో రాణించిన ఫోబే లిచ్​ఫీల్డ్​కు మాజీలతో ఆడే ఛాన్స్​ దక్కించుకుంది. దేశవాళీ లీగ్​ల్లో రాణిస్తోన్న ఈ చిన్నారి పేరును.. ఆస్ట్రేలియా మాజీ అలెక్స్​ బ్లాక్​వెల్​ సూచించినట్లు తెలుస్తోంది. స్టార్​లతో కలిసి ఆడే అవకాశం రావడంపై ఆనందం వ్యక్తం చేసింది ఫోబే.

16 ఏళ్ల ఫోబే లిచ్​ఫీల్డ్​