ఇంగ్లాండ్తో జరిగిన మొదటి వన్డేతో జాతీయ జట్టులో అరంగేట్రం చేశాడు టీమ్ఇండియా ఆల్రౌండర్ కృనాల్ పాండ్యా. ఇప్పటికే జట్టుకు ఆడుతున్న హార్దిక్ పాండ్యా ఇతడి సోదరుడు. ఫలితంగా వన్డేల్లో భారత్కు ప్రాతినిథ్యం వహించిన మూడో సోదరుల జోడీగా గుర్తింపు సాధించారు పాండ్యా బ్రదర్స్. ఈ నేపథ్యంలో ఇప్పటివరకు వన్డేల్లో భారత్కు ఆడిన సోదరులు ఎవరో చూద్దాం.
హార్దిక్ పాండ్యా -కృనాల్ పాండ్యా
ఇంగ్లాండ్తో జరిగిన తొలి వన్డేలో కృనాల్ అరంగేట్రం చేయడం ద్వారా భారత్కు ప్రాతినిథ్యం వహించిన మూడో సోదరుల జోడీగా గుర్తింపు పొందింది హార్దిక్-కృనాల్ పాండ్యా జోడీ. అరంగేట్ర మ్యాచ్లోనే 26 బంతుల్లోనే అర్ధశతకం చేసి అదరగొట్టాడు కృనాల్. ఇప్పటికే పరిమిత ఓవర్ల జట్టులో రెగ్యులర్ ఆటగాడిగా కొనసాగుతున్నాడు హార్దిక్. ఇతడు ఇప్పటివరకు 58 వన్డేలు, 48 టీ20 మ్యాచ్లు ఆడాడు. కృనాల్ పాండ్యా 18 టీ20లకు ప్రాతినిథ్యం వహించాడు. వీరిద్దరూ ఐపీఎల్లో ముంబయి ఇండియన్స్కు ఆడుతున్నారు.
యూసఫ్ పఠాన్-ఇర్ఫాన్ పఠాన్
2007 టీ20 ప్రపంచకప్ ఫైనల్తో జట్టులోకి ఎంట్రీ ఇచ్చిన యూసఫ్ పఠాన్.. 2011 ప్రపంచకప్లో విజేతగా నిలిచిన జట్టులోనూ సభ్యుడిగా ఉన్నాడు. తర్వాత భారత జట్టు ఎన్నో విజయాల్లో పాలుపంచుకున్న ఇతడు తన సోదరుడు ఇర్ఫాన్ పఠాన్తో 2007 టీ20 ప్రపంచకప్లో కలిసి ఆడాడు. తద్వారా ప్రపంచకప్ విజేతగా నిలిచిన భారత జట్టుకు ప్రాతినిథ్యం వహించిన తొలి సోదరుల జోడీగా రికార్డులకెక్కారు 2012 ఆసియా కప్లో భాగంగా పాకిస్థాన్తో జరిగిన వన్డేలో తొలిసారి ఇద్దరూ కలిసి ఆడారు. ఇర్ఫాన్ పఠాన్ కెరీర్లో 29 టెస్టులు, 120 వన్డేలు, 24 టీ20లు ఆడి 301 వికెట్లు సాధించాడు. ఇందులో టెస్టు సెంచరీతో పాటు ఓ హ్యాట్రిక్ కూడా ఉంది. యూసఫ్ పఠాన్ 57 వన్డేలు, 22 టీ20లకు ప్రాతినిథ్యం వహించాడు. ఇర్ఫాన్ గతేడాది రిటైర్మెంట్ ప్రకటించగా, యూసఫ్ ఇటీవలే వీడ్కోలు పలికాడు.
మొహిందర్ అమర్నాథ్-సురిందర్ అమర్నాథ్
టీమ్ఇండియా తరఫున వన్డేలకు ప్రాతినిథ్యం వహించిన తొలి సోదరుల జోడీగా గుర్తింపు పొందారు మొహిందర్-సురిందర్ అమర్నాథ్ జోడీ. సురిందర్ కేవలం మూడు వన్డేల్లోనే ఆడగా.. ఈ మూడు మ్యాచ్ల్లోనూ అమర్నాథ్ ఆడాడు. పాకిస్థాన్తో 1978-79 సిరీస్లో ఈ ఇద్దరూ కలిసి ఆడారు. సురిందర్ టీమ్ఇండియా తరఫున 10 టెస్టులు కూడా ఆడాడు. అలాగే మొహిందర్ 69 టెస్టులు, 85 వన్డేలకు ప్రాతినిథ్యం వహించాడు.
