2007 ప్రపంచకప్. ఆసియాలోని క్రికెట్ అభిమానులకు చేదు అనుభవం మిగిల్చిన మెగా టోర్నమెంట్. పసికూన బంగ్లాదేశ్పై ఓటమి చవిచూసి లీగ్ దశలోనే ఇంటిముఖం పట్టింది టీమ్ఇండియా. మరో పసికూన ఐర్లాండ్ చేతిలో ఘోర పరాజయంపాలై టోర్నీ నుంచి నిష్ర్కమించింది పాకిస్థాన్. అభిమానులు బాధలో ఉన్న సమయంలో ఓ ఘటన యావత్ క్రికెట్ ప్రపంచాన్నే కుదిపేసింది. అదే అప్పటి పాకిస్థాన్ కోచ్ బాబ్ వూల్మర్ మరణం.
అనుమానాస్పద రీతిలో...
2007, మార్చి 18... వెస్టిండిస్లోని కింగ్స్టన్లో ఉన్న పెగాసస్ హోటల్. గది నం. 374లో పాక్ కోచ్ బాబ్ వూల్మర్ అనుమానాస్పద రీతిలో, రక్తపు మడుగులో బాత్టబ్లో పడి ఉన్నాడు. ఐర్లాండ్ చేతిలో పాక్ ఘోరంగా పరాభవానికి గురైన కొన్ని గంటలకే ఈ ఘటన చోటుచేసుకుంది. గోడల మీద రక్తపు మరకలు ఎన్నో అనుమానాలు రేకెత్తించాయి. 58 ఏళ్ల బాబ్ ఎలా చనిపోయాడనేది క్రికెట్ ప్రపంచాన్ని కలవరానికి గురిచేసిన అంశం.
బాబ్ వూల్మర్కు అభిమానుల నివాళి ఎన్నో ప్రశ్నలు...
58 ఏళ్ల వూల్మర్ మధుమేహానికి చికిత్స తీసుకునేవాడు. అందుకే మరణించాడా? ఆయన మృతికి బెట్టింగ్ మాఫియాతో సంబంధం ఉందా? పసికూనపై ఓటమి భరించలేకే పాకిస్థాన్ అభిమానుల్లో ఎవరైనా బాబ్ను హత్య చేశారా? లేక ఇది అండర్వరల్డ్ పనేనా? పాకిస్థాన్ జట్టు సభ్యుల్లో ఎవరైనా బాబ్ను హత్య చేశారా? ఇవి బాబ్ వూల్మర్ అనుమానాస్పద మృతి అనంతరం క్రికెట్ అభిమానులను కలవరపెట్టిన ప్రశ్నలు.
పోలీసు విచారణ...
ఈ మిస్టరీని ఛేదించడానికి రంగంలోకి దిగింది జమైకన్ పోలీసు బృందం. బాబ్ మృతదేహాన్ని పరిశీలించింది. పాక్ క్రికెటర్ల నుంచి వాగ్మూలం నమోదు చేసింది. అనంతరం నివేదిక రూపొందించింది. పాక్ కోచ్ గొంతును గుడ్డతో నులిమారని, అందుకే వూల్మర్ ఊపిరి అందక మరణించాడని ప్రకటించింది. అయితే ఈ ఘటనతో జమైకా గూండాలకు సంబంధం లేదని తేల్చింది.
ముగ్గురిపై అనుమానం...
మార్చి 24న పాకిస్థాన్ జట్టు... మాంటిగో బే నుంచి లండన్కు వెళ్లడానికి సిద్ధంగా ఉన్న సమయంలో ఇంజమామ్, జట్టు సహాయ కోచ్ ముస్తాక్ అహ్మద్, మేనేజర్ తలత్ అలీని పోలీసులు అదుపులోకి తీసుకున్నారు. వారి వాగ్మూలాలపై సందేహాలు ఉన్నందుకే అదుపులోకి తీసుకున్నట్టు స్పష్టం చేశారు. విచారణ అనంతరం ఆ ముగ్గురిని విడిచిపెట్టారు.
మేనేజర్ తలత్ అలీ, ఇంజమామ్ పాక్ జట్టుపై ప్రభావం..
బాబ్ వూల్మర్ మరణం అప్పటి పాకిస్థాన్ జట్టుపై తీవ్ర ప్రభావం చూపింది. ఘటన అనంతరం ఎదుర్కొన్న పరిస్థితులు తన జీవితంలోనే అత్యంత బాధాకరమైనవని యూనిస్ఖాన్ ఆవేదన వ్యక్తం చేశాడు.
" ఒకానొక పరిస్థితిలో జమైకన్ అధికారులు మాతో ప్రవర్తించిన తీరు చాలా కోపం తెప్పించింది. మమ్మల్ని క్రికెటర్లలా కాకుండా ఒక నేరస్థుల్లా చూశారు"
యూనిస్ ఖాన్, పాక్ మాజీ ఆటగాడు.
ఈ ఘటన జరిగిన మూడు నెలలకు బాబ్ది సాధారణ మరణమేనని, ఎవరూ హత్య చేయలేదని ప్రకటించిన జమైకా పోలీసులు... కేసును మూసేశారు. కానీ కొన్ని ప్రశ్నలకు సమాధానాలు లేక ఇప్పటికీ పాకిస్థాన్ మాజీ కోచ్ బాబ్ వూల్మర్ మృతి ఓ మిస్టరీగానే మిగిలిపోయింది.
