ఈ దశాబ్దపు ప్రపంచ మేటి వన్డే బౌలర్లు వీరే..!

క్రికెట్.. బ్యాట్స్​మెన్ గేమ్​ అని కొంతమంది విమర్శలు చేసినప్పటికీ.. పదునైన బౌలింగ్​తో ప్రత్యర్థులకు ముచ్చెమటలు పట్టిస్తున్నారు బౌలర్లు. ఈ దశాబ్దంలో అత్యద్భుతంగా ఆకట్టుకున్న టాప్-10 బౌలర్ల గురించి ఇప్పుడు చూద్దాం.

క్రికెట్.. జెంటిల్మన్ గేమ్ ఒకప్పుడు బ్యాట్స్​మెన్​కు దీటుగా బౌలర్లు కూడా చెలరేగేవాళ్లు. ప్రత్యర్థులకు చుక్కలు చూపిస్తూ.. పిచ్​పై నిప్పులు చెరిగేవాళ్లు. క్రమేణా పవర్ ప్లే నిబంధనలు, ఫీల్డింగ్ ప్రతిబంధకాలతో క్రికెట్​ బ్యాట్స్​మెన్​కు స్వర్గాధామంగా మారింది. గతంతో పోలిస్తే బౌలర్ల ప్రభావం కొద్దిగా తగ్గినప్పటికీ ఈ దశాబ్దంలోనూ తమ పదునైన బౌలింగ్​తో ఆకట్టుకుంటున్నారు కొంతమంది బౌలర్లు. పాయింట్ల వారిగా వారిపై ఇప్పుడు ఓ లుక్కేద్దాం.

మిచెల్ స్టార్క్​.. 9.5/10

ప్రస్తుత తరంలో అత్యుత్తమ వన్డే బౌలర్లలో ముందువరుసలో ఉన్నాడు ఆస్ట్రేలియా ఫాస్ట్ బౌలర్ మిచెల్ స్టార్క్. ఈ దశకంలో 172 వికెట్లు తీసి అదరగొడుతున్నాడు. ముఖ్యంగా కొత్త బంతితో పదునైన పేస్​తో పాటు స్వింగ్​ కూడా రాబడుతూ ప్రత్యర్థులకు చుక్కలు చూపిస్తున్నాడు. డెత్ ఓవర్లలో అతడు వేసే యార్కర్లకు బ్యాట్స్​మెన్ చేతులేత్తెస్తున్నారంటే అర్థం చేసుకోవచ్చు. 2015, 2019 ప్రపంచకప్​ల్లో ఆస్ట్రేలియా విజయాల్లో కీలక పాత్ర పోషించాడు. ముఖ్యంగా 2015 మెగాటోర్నీలో అత్యధిక వికెట్లతో(22) మ్యాన్ ఆఫ్ ద సిరీస్ అవార్డు దక్కించుకున్నాడు.

మిచెల్ స్టార్క్​

లసిత్ మలింగ.. 9/10

ఈ దశాబ్దంలో లీడింగ్ వికెట్ టేకర్​గా గుర్తింపు తెచ్చుకున్నాడు శ్రీలంక బౌలర్ లసిత్ మలింగ. 2010 జనవరి నుంచి 162 వన్డేల్లో 248 వికెట్లు తీసి అద్భుతంగా ఆకట్టుకున్నాడు. 5 కంటే ఎక్కువ వికెట్లు 8 సార్లు తీసి ఎవరికి దక్కని ఘనత సాధించాడు మలింగ. ఈ కారణంగా అతడు ఈ దశాబ్దపు మేటి బౌలర్ల జాబితాలో చేరాడు. అయితే పదే పదే గాయాల బారిన పడడం, ఫిట్​నెస్​లేమితో రెండో స్థానానికే పరిమితమయ్యాడు.

లసిత్ మలింగ

ట్రెంట్ బౌల్ట్​.. 9/10

ఆసీస్​ జట్టులో స్టార్క్ ఎలాగో.. న్యూజిలాండ్​కు ట్రెంట్ బౌల్ట్​ ఆ రకంగా ఆకట్టుకుంటున్నాడు. 2012లో వన్డేల్లో అరంగేట్రం చేసిన బౌల్ట్.. 165 వన్డేల్లో 25 సగటుతో 164 వికెట్లు తీశాడు. ప్రతి 5 ఓవర్లకు ఓ వికెట్ చొప్పున తీస్తూ వన్డే క్రికెట్లో చక్కటి ప్రదర్శన చేస్తున్నాడు. 2015 ప్రపంచకప్​లో కివీస్ ఫైనల్ చేరడంలో కీలక పాత్ రపోషించాడు బౌల్ట్. అంతేకాకుండా ఈ దశాబ్దంలో న్యూజిలాండ్ మెరుగైన స్థితిలో నిలవడంలో ఇతడి పాత్ర ఎంతో ఉంది.

బౌల్ట్​

జస్ప్రీత్ బుమ్రా.. 8.5/10

ఈ దశాబ్దం రెండో అర్ధభాగంలో అంతర్జాతీయ మ్యాచ్​ల్లో అరంగేట్రం చేసి.. అనతికాలంలోనే ప్రపంచ వ్యాప్తంగా గుర్తింపు తెచ్చుకున్న బౌలర్ జస్ప్రీత్ బుమ్రా. 2016లో తొలి వన్డే ఆడిన ఇతడు ఫార్మాట్​ ఏదైనా.. ప్రదర్శనలో ఏమాత్రం తడబాటు లేకుండా సత్తాచాటుతున్నాడు. కేవలం 58 వన్డేలాడిన ఈ గుజరాత్ పేసర్ 21.88 సగటుతో 103 వికెట్లు తీశాడు. ఈ ఘనత సాధించిన మూడో బౌలర్​గా రికార్డు సృష్టించాడు. ఓవర్​కు 4.49 పరుగులు ఇస్తూ.. ప్రతి 29 బంతులకో వికెట్ తీస్తున్నాడు.

బుమ్రా

రషీద్ ఖాన్​.. 8.5/10

బుమ్రా తర్వాత ఈ దశాబ్దం రెండో అర్ధభాగంలో అరంగేట్రం చేసిన మరో బౌలర్ అఫ్గనిస్థాన్​ స్పిన్నర్ రషీద్ ఖాన్. తెలుపు బంతి క్రికెట్​లో అత్యుత్తమ సగటుతో చరిత్ర సృష్టించాడు రషీద్. 18.54 సగటుతో 133 వికెట్లు తీసి ఎవరికి దక్కని ఘనత సొంతం చేసుకున్నాడు. కొనేళ్లుగా అఫ్గానిస్థాన్ విజయాలతో దూసుకెళ్తోందంటే అందుకు రషీదే కారణం. టీ20ల్లో ఈ లెగ్ స్పిన్నర్ పిచ్ ఎలాంటిదైనా రెండు వైపులా బంతిని టర్న్ చేస్తూ బ్యాట్స్​మెన్​ను ఇబ్బంది పెడుతుంటాడు.

రషీద్ ఖాన్​

డేల్ స్టెయిన్​.. 7.5/10

ఈ దశకం తొలి అర్ధభాగంలో ప్రపంచ మేటి బౌలర్లలో ముందువరుసలో ఉన్న స్టెయిన్.. 2015 ప్రపంచకప్ తర్వాత వెనకంజ వేశాడు. 90 వన్డేల్లో 24.80 సగటుతో 145 వికెట్లు తీసి మంచి ప్రదర్శన చేశాడు. ఇందులో 111 వికెట్లు 69 మ్యాచ్​ల్లోనే దక్కించుకున్నాడు. మ్యాచ్​కు కనీసం రెండు వికెట్లు తన ఖాతాలో వేసుకుంటూ అత్యుత్తమ పేసర్​గా ఎదిగాడు. అయితే 2015 మెగాటోర్నీ తర్వాత ఫిట్​నెస్ లేమి, తరచూ గాయాల పాలవ్వడం లాంటి సమస్యలతో బౌలింగ్​లో మునుపటి పదును తగ్గింది.

డేల్ స్టెయిన్​

ఇమ్రాన్ తాహిర్.. 8/10

ప్రపంచంలోనే అత్యుత్తమ లెగ్ స్పిన్నర్​గా పేరు తెచ్చుకున్నాడు దక్షిణాఫ్రికా బౌలర్ ఇమ్రాన్ తాహిర్. ఈ దశాబ్దంలో 173 వికెట్లు తీసి క్రికెట్ ప్రేమికుల దృష్టి ఆకర్షించాడు. మిడిల్ ఓవర్లలో పదే పదే వికెట్లు తీస్తూ బ్యాట్స్​మెన్​ను ఇబ్బందికి గురి చేస్తుంటాడు. కొన్నేళ్లుగా పరిమిత ఓవర్ల క్రికెట్​లో నిలకడగా బౌలింగ్ చేస్తూ.. ఆకట్టుకున్నాడు. 2019 ప్రపంచకప్ అనంతరం వన్డే క్రికెట్​కు వీడ్కోలు పలికాడు తాహిర్. అయితే టీ20ల్లో ఆడుతున్నాడు.

ఇమ్రాన్ తాహిర్

మహ్మద్ షమీ.. 7.5/10

బుమ్రా తర్వాత ఆ స్థాయిలో పేరు తెచ్చుకున్న భారత బౌలర్ మహ్మద్ షమీ. జహీర్​ ఖాన్ తర్వాత అతడి స్థానాన్ని భర్తీ చేస్తూ.. జట్టులోకి వచ్చిన ఈ బంగాల్ బౌలర్ వన్డే క్రికెట్​లో ఆకట్టుకునే ప్రదర్శన చేస్తున్నాడు. 2013 జనవరిలో అరంగేట్రం చేసిన ఇతడు 24.71 సగటుతో 131 వికెట్లు తీశాడు. పరుగులు సమర్పిస్తాడు అనే పేరు ఉన్నప్పటికీ నిలకడగా వికెట్లు తీస్తూ జట్టులో స్థానం సుస్థిరం చేసుకున్నాడు. 2015, 2019 ప్రపంచకప్​ల్లో మెరుగ్గా రాణించాడు.

మహ్మద్ షమీ

సయిద్ అజ్మల్.. 7/10

ఈ దశాబ్దం తొలి అర్ధభాగంలో అద్భుతంగా సత్తాచాటాడు పాక్ స్పిన్నర్ అజ్మల్. 2009లో వన్డేల్లో అరంగేట్రం చేసిన అజ్మల్.. ఐదేళ్ల పాటు అంతర్జాతీయ మ్యాచ్​ల్లో అదరగొట్టాడు. 91 మ్యాచ్​ల్లో 21.90 సగటుతో 151 వికెట్లు తీశాడు. 4.24 ఎకానమీ రేటుతో ఈ ప్రదర్శన చేయడం విశేషం. అయితే 2014లో అనుమానాస్పద బౌలింగ్ యాక్షన్​తో ఐసీసీ నిషేధాన్ని ఎదుర్కొన్నాడు. అనంతరం శైలి మార్చుకుని పునరాగానం చేసినా ఇంతకుముందున్న పదును లోపించింది. చివరకు 2015లో జాతీయ జట్టుకు దూరమయ్యాడు.

సయిద్ అజ్మల్

షకిబుల్ హసన్.. 7/10

ప్రపంచంలో అత్యుత్తమ ఆల్​రౌండర్లలో ఒకరిగా గుర్తింపు తెచ్చుకున్న బంగ్లాదేశ్ క్రికెటర్ షకిబుల్​.. బౌలింగ్​లోనూ మంచి గణాంకాలు నమోదు చేశాడు. లెఫ్టార్మ్​ స్పిన్నర్​గా మెరుగ్గా రాణించాడు. ఈ దశాబ్దంలో 131 వన్డేల్లో 30.15 సగటుతో 177 వికెట్లు తీశాడు. 4.72 ఎకానమీతో వికెట్లు తీయడమే కాదు పొదుపుగా బౌలింగ్ చేస్తూ.. బంగ్లా విజయాల్లో కీలక పాత్ర పోషించాడు.

షకిబుల్

ఇదీ చదవండి: మా దృష్టంతా విదేశీయులపైనే: పాంటింగ్