దేశవాళీ క్రికెట్ టోర్నీల​ నిర్వహణ దిశగా బీసీసీఐ

కరోనా మార్గదర్శకాలు పాటిస్తూనే మరిన్ని క్రికెట్​ టోర్నీల నిర్వహణకు బీసీసీఐ ప్రణాళికలు చేస్తోంది. ఇప్పటికే ముస్తాక్​ అలీ టోర్నీ విజయవంతమైన నేపథ్యంలో.. విజయ్​ హజారే, మహిళల వన్డే, వినూ మన్కడ్​ వంటి ట్రోఫీల నిర్వహణపై అభిప్రాయం చెప్పాలంటూ రాష్ట్రాల క్రికెట్ అసోసియేషన్లకు లేఖలు రాసింది.

సయ్యద్ ముస్తాక్​ అలీ టోర్నీ తుది దశకు చేరింది. కరోనా ఆంక్షలు పాటిస్తూనే ఈ ట్రోఫీ నిర్వహణ సజావుగా సాగించింది భారత క్రికెట్​ నియంత్రణ బోర్డు(బీసీసీఐ). దీంతో విజయ్​ హజారే, మహిళల వన్డే, వినూ మన్కడ్​ టోర్నీల నిర్వహణపైనా దృష్టి సారించింది బీసీసీఐ. టోర్నీల నిర్వహణపై నిర్ణయాలు, అభిప్రాయాలు తెలియజేయాలంటూ.. రాష్ట్రాల క్రికెట్​ అసోసియేషన్​లకు బీసీసీఐ కార్యదర్శి జై షా లేఖలు రాశారు.

" మహిళల క్రికెట్​ జరిగేలా చూడటం ముఖ్యమైన అంశం. సీనియర్​ మహిళల వన్డే టోర్నమెంట్​తో సహా విజయ్​ హజారే ట్రోఫీని నిర్వహించాలని సంకల్పించాం. దాంతోపాటు అండర్​-19 వినూ మన్కడ్ ట్రోఫీని జరపాలని అనుకుంటున్నాం. 2020-21 సీజన్​కు సంబంధించి మిగిలి ఉన్న దేశవాళీ క్రికెట్​ నిర్వహణ అంశంపై మీ నిర్ణయాన్ని తెలుపాల్సిందిగా కోరుతున్నాం."

- జై షా, బీసీసీఐ కార్యదర్శి

బీసీసీఐ నిర్ణయాన్ని స్వాగతిస్తూ, కృతజ్ఞతలు తెలిపారు ఓ మహిళ క్రికెటర్​. ఇది తమకు శుభవార్త అని ఆనందం వ్యక్తం చేసింది. కఠోర సాధన చేస్తున్న తమకు టోర్నీ నిర్వహణ స్ఫూర్తినిచ్చే అంశమని పేర్కొంది. ఐపీఎల్​ కంటే ముందే విజయ్​ హజారే టోర్నీ నిర్వహించడం శుభ పరిణామమని ఓ క్రికెటర్​ తెలిపాడు. ఈ టోర్నీ ప్రదర్శనతో మరికొంత మంది వెలుగులోకి వస్తారని పేర్కొన్నాడు.

కాగా, బీసీసీఐ లేఖకు స్పందించిన చాలా రాష్ట్రాలు 50 ఓవర్ల విజయ్​ హజారే టోర్నీకి సుముఖత వ్యక్తం చేశాయి. దీని నిర్వహణ చాలా సులభమని పేర్కొన్నాయి. మహిళల వన్డే, అండర్​-19 టోర్నీలు దేశవాళీ ఆటగాళ్లకు మరింత ప్రోత్సాహకంగా ఉంటాయని తెలిపాయి.

ఇదీ చదవండి:అభాగ్య వృద్ధులపై అమానవీయం..!