బీసీసీఐ నూతన అధ్యక్షుడిగా బుధవారం.. బాధ్యతలు చేపట్టాడు సౌరభ్ గంగూలీ. అనంతరం టీమిండియా సీనియర్ క్రికెటర్ మహేంద్ర సింగ్ ధోనీ రిటైర్మెంట్ గురించి మాట్లాడాడు. మహీని దేశానికి గర్వకారణంగా అభివర్ణించాడు. క్రికెట్లో అతడొక తురుపుముక్కని, తన పదవీ కాలంలో ధోనీ మళ్లీ క్రికెట్ ఆడితే బాగుంటుందని అభిప్రాయం వ్యక్తం చేశాడు.
" క్రికెట్ కొనసాగించాలా, వద్దా అనేది ధోనీ వ్యక్తిగత నిర్ణయం. నేనూ ఒకానొక సమయంలో క్రికెట్ను వదిలేద్దామనుకున్నా, కాని ప్రపంచం ఒప్పుకోలేదు. అందుకే మరో నాలుగేళ్లు ఆటలో కొనసాగాను. ఛాంపియన్లు త్వరగా క్రీడను వదిలిపెట్టకూడదు. కెరీర్ కోసం మహీ మనసులో ఏముందో నాకైతే తెలియదు. కచ్చితంగా ఈ విషయం గురించి అతడితో చర్చిస్తా. అతడొక అద్భుతమైన ఆటగాడు"
--గంగూలీ, బీసీసీఐ అధ్యక్షుడు
దేశానికి ఎనలేని విజయాలు అందించిన అధ్బుతమైన సారథిగా ధోనీపై ప్రశంసల వర్షం కురిపించాడు గంగూలీ.
"ధోనీని చూసి యావత్ దేశం గర్విస్తోంది. క్రీడల్లో దేశానికి తెచ్చిన పేరు, విజయాలు అతడ్ని అత్యుత్తమంగా తయారుచేశాయి. మహీ సాధించిన ఘనతలు కూర్చొని రాస్తే, ఎవరైనా వావ్ అనకుండా ఉండలేరు. నేను ఈ పదవిలో ఉన్నంతవరకు అందరికీ తగిన గౌరవం దక్కేలా చూస్తాను."
--గంగూలీ, బీసీసీఐ అధ్యక్షుడు
టీమిండియా ప్రస్తుత సారథి విరాట్ కోహ్లీతో గంగూలీ... రేపు (గురువారం) భేటీ కానున్నాడు. ఇందులో ధోనీ భవిష్యత్తు ప్రణాళికపై చర్చించనున్నాడు.