సయ్యద్ ముస్తాక్ అలీ టీ20 టోర్నమెంటుతో దేశవాళీ సీజన్ను ప్రారంభించాలని బీసీసీఐ నిర్ణయించింది. నవంబరు 19న ఈ టోర్నీ నిర్వహించేలా తాత్కాలిక తేదీలను వెల్లడించింది. అయితే, ఐపీఎల్ జట్లలోని భారత ఆటగాళ్లు క్వారంటైన్ నిబంధనల కారణంగా లీగ్ దశ మ్యాచ్లకు హాజరు కాలేరని అధికారులు పేర్కొన్నారు.
కరోనా కారణంగా దేశవాళీ సీజన్ నిర్వహణలో ఆలస్యమైంది. ఫలితంగా ఈ ఏడాది కేవలం ముస్తాక్ అలీ, రంజీ ట్రోఫీలు(డిసెంబరు13-మార్చి10)మాత్రమే నిర్వహించనున్నారు. ఇందులో మొత్తం 38 జట్లు 245 మ్యాచ్లు ఆడనున్నాయి. అయితే విజయ్ హజారే, దులీప్ ట్రోఫీలు ఉండవని అధికారులు స్పష్టం చేశారు. ఇరానీ కప్పైనా సందిగ్ధత నెలకొన్నట్లు వెల్లడించారు.
"ఇది తాత్కాలిక షెడ్యూల్. బీసీసీఐ అధ్యక్షుడు సౌరభ్ గంగూలీ, వైస్ ప్రెసిడెంట్ జై షా ఆమోదం లభించాల్సి ఉంది. అయితే, ఐపీఎల్ జట్టులో ఉండి అవకాశాలు రాని ఆటగాళ్లతో ఇక్కడ ఒక సమస్య ఉంది. ఎవరైతే టీమ్లో ఉంటారో వారు ఆడాలని కోరుకుంటారు. అయితే, ప్లే ఆఫ్స్కు ముందే జట్టు లీగ్ నుంచి వైదొలిగినప్పటికీ.. వారిని దేశవాళీ క్రికెట్లో నవంబరు 3కు ముందు అనుమతించరు. కచ్చితంగా 14 రోజులపాటు క్వారంటైన్లో ఉండాల్సిందే. ఈ క్రమంలోనే వారు దేశవాళీ లీగ్ దశ మ్యాచ్లను కోల్పోవాల్సి ఉంటుంది. కాబట్టి, నాకు తెలిసి టోర్నీ నిర్వహణలో మార్పులు జరగవచ్చు."
-బీసీసీఐ అధికారి
వచ్చే ఏడాది ఐపీఎల్ను మార్చి చివర్లో నిర్వహించాలని బీసీసీఐ భావిస్తోంది. ఈ క్రమంలోనే రంజీ ఫైనల్- ఐపీఎల్ ప్రారంభానికి మధ్య మూడు వారాల వ్యవధి ఇవ్వడం అత్యవసరమని యోచిస్తోంది. ఫలితంగా ఆటగాళ్లకు కాస్త విరామం దొరుకుతంది. మరోవైపు రంజీ ట్రోఫీని జోనల్ ఫార్మాట్లో నిర్వహించనున్నట్లు వస్తున్న ఊహాగానాలపై స్పందిస్తూ.. అవన్నీ అవాస్తవమని అధికారులు పేర్కొన్నారు.
