పంత్​కు చోటెందుకు లేదంటే.. గంగూలీ స్పందన ఇదే!

టీమిండియా యువ వికెట్​ కీపర్​ రిషభ్​ పంత్​ ప్రస్తుతం గడ్డుపరిస్థితి ఎదుర్కొంటున్నాడు. ఈ మధ్య కాలంలో ఫామ్​ లేమితో ఇబ్బందులు పడుతున్న ఎడమచేతి బ్యాట్స్​మెన్​.. ఎలాగోలా పలు సిరీస్​ల్లో చోటు దక్కించుకున్నాడు. అయితే ఆస్ట్రేలియాతో సిరీస్​ తర్వాత అతడి స్థానానికి కేఎల్​ రాహుల్​ రూపంలో చిక్కొచ్చిపడింది. రాహుల్​ అటు బ్యాటింగ్, ఇటు కీపింగ్​తోనూ అదరగొట్టడం జట్టులో పంత్​ స్థానాన్ని ప్రశ్నార్థకం చేసింది. తాజాగా న్యూజిలాండ్​తో సిరీస్​కు ఎంపికైనా మొదటి టీ20లో చోటు దక్కించుకోలేదు. దీనిపై తాజాగా గంగూలీ స్పందించాడు.

పరిమిత ఓవర్ల క్రికెట్​లో టీమిండియా ఆటగాడు కేఎల్‌ రాహుల్‌ అద్భుత ప్రదర్శన చేస్తున్నాడు. న్యూజిలాండ్​తో జరిగిన తొలి టీ20లోనూ అదరగొట్టాడు. అతడి ప్రదర్శన, ఫామ్​పై ప్రశంసల వర్షం కురిపించాడు బీసీసీఐ అధ్యక్షుడు సౌరభ్​ గంగూలీ. సుదీర్ఘ ఫార్మాట్‌లోనూ అతడు ఇదే జోరు కొనసాగిస్తాడని ధీమా వ్యక్తం చేశాడు. అనంతరం న్యూజిలాండ్​తో జరిగిన మొదటి మ్యాచ్​లో పంత్​కు తుది జట్టులో చోటు దక్కకపోవడంపైనా స్పందించాడు దాదా.

" ప్రస్తుతం జట్టు యాజమాన్యం ఇచ్చిన ప్రతి పాత్రను రాహుల్‌ సమర్థంగా పోషిస్తున్నాడు. బ్యాట్స్‌మెన్‌గా ఏ స్థానంలోనైనా పరుగులు చేస్తూ వికెట్‌ కీపింగ్‌లోనూ రాణిస్తున్నాడు. కేఎల్‌ రాహుల్‌ పాత్రను జట్టు యాజమాన్యం, సారథి నిర్ణయిస్తారు. వన్డేలు, టీ20ల్లో రాహుల్‌ చాలా బాగా ఆడుతున్నాడు. టెస్టు క్రికెట్‌నూ అతడు చక్కగా ఆడేవాడు. ఆ తర్వాత నెమ్మదించాడు. పరిమిత ఓవర్ల క్రికెట్లో మాత్రం నమ్మకం నిలబెట్టుకున్నాడు. అతడిలాగే సాగిపోవాలని కోరుకుంటున్నా. పంత్​ను ఎంపికచేయకపోవడం వంటి నిర్ణయాలన్నీ జట్టు యాజమాన్యం తీసుకుంటుంది".

--గంగూలీ, బీసీసీఐ అధ్యక్షుడు

టీ20 ప్రపంచకప్‌నకు వికెట్‌ కీపింగ్‌ రేసులో ఎవరుంటారని ప్రశ్నించగా.. అందులో తన ప్రమేయం అంతగా ఉండదని చెప్పాడు దాదా. ఆ విషయంలో సెలక్టర్లు, విరాట్‌, రవిశాస్త్రి నిర్ణయం కీలకమని స్పష్టం చేశాడు.