రాహుల్​కు షాక్​.. కివీస్​తో టెస్ట్​ జట్టులో విహారి, గిల్​

న్యూజిలాండ్​తో రెండు టెస్టుల సిరీస్​కు భారత జట్టును ప్రకిటించింది బీసీసీఐ. ఇందులో పృథ్వీ షా, శుభ్​మన్​ గిల్ సహా తెలుగబ్బాయి హనుమ విహారి​ చోటు దక్కించుకున్నాడు. డోపింగ్​ నిషేధం తర్వాత మళ్లీ ఫామ్​ నిరూపించుకున్న పృథ్వీ... వన్డే, టెస్టు సిరీస్​ల్లో స్థానం సంపాదించుకున్నాడు. అయితే ఆల్​టైమ్​ ఫామ్​లో ఉన్న రాహుల్​కు నిరాశే ఎదురైంది.

న్యూజిలాండ్​తో రెండు టెస్టుల సిరీస్​కు కోహ్లీ సేన సిద్ధమైంది. ఈ సిరీస్​కు స్టార్​ బ్యాట్స్​మెన్​ రోహిత్​శర్మ, శిఖర్​ ధావన్​ దూరమవగా...​ పృథ్వీ షా, శుభ్​మన్​ గిల్, హనుమ విహారి​ చోటు దక్కించుకున్నారు. టెస్ట్​ల్లోకి రీ ఎంట్రీ ఇస్తాడనుకున్న రాహుల్​కు మాత్రం నిరాశ తప్పలేదు. ఫిబ్రవరి 21 నుంచి తొలి టెస్టు ప్రారంభంకానుంది.

గిల్- విహారికి ఛాన్స్​...

భారత యువ ఆటగాడు శుభ్‌మన్‌ గిల్‌.. న్యూజిలాండ్​- ఏ తో జరిగిన తొలి అనధికారిక టెస్టులో డబుల్‌ సెంచరీతో రాణించాడు. ఈ మ్యాచ్​లో 204 రన్స్​తో అజేయంగా నిలిచాడు. ఇతడితో పాటు ఇదే మ్యాచ్​లో సెంచరీతో అజేయంగా నిలిచాడు ఆంధ్ర కెప్టెన్​ హనుమ విహారి. తాజా ప్రదర్శనతో వీరిద్దరికీ టెస్టు జట్టులో చోటు దక్కింది.

రోహిత్​ దూరం...

గాయం కారణంగా కివీస్​తో టెస్టు సిరీస్​కు స్టార్ బ్యాట్స్​మన్ రోహిత్ శర్మ దూరమయ్యాడు. హిట్​మ్యాన్​ స్థానంలో పృథ్వీ లేదా గిల్​ ఓపెనింగ్​ చేసే అవకాశముంది. మయాంక్​ అగర్వాల్​ మరో ఓపెనర్​గా బరిలోకి దిగనున్నాడు. కివీస్​తో ఇటీవల జరిగిన ఐదో టీ20లో కాలిపిక్క గాయంతో ఇబ్బందిపడ్డాడు రోహిత్​. 60 పరుగులు చేసి రిటైర్డ్​హర్ట్​గా వెనుదిరిగాడు హిట్​మ్యాన్. అనంతరం ఫీల్డింగ్​ చేయడానికి రాలేదు. ప్రస్తుతం ఈ గాయం నుంచి కోలుకునే అవకాశం లేకపోవడం వల్ల అతను వన్డే సహా కివీస్​ పర్యటనకు దూరమయ్యాడు.

భారత జట్టు ఇదే...

విరాట్​ కోహ్లీ (కెప్టెన్​), మయాంక్​ అగర్వాల్​, పృథ్వీ షా, శుభ్​మన్​ గిల్​, ఛెతేశ్వర్​ పుజారా, అజింక్య రహానే (వైస్​ కెప్టెన్​), హనుమ విహారీ, వృద్ధిమాన్​ సాహా (కీపర్​), రిషబ్​ పంత్​, రవిచంద్ర అశ్విన్​, రవీంద్ర జడేజా, జస్ప్రిత్​ బుమ్రా, ఉమేశ్​ యాదవ్​, మహ్మద్​ షమి, నవదీప్​ సైనీ, ఇషాంత్​ శర్మ.

ఇదీ చూడండి...