'ఆల్కహాల్ బ్రాండ్ లోగో ఉన్న జెర్సీ ధరించను'

ప్రస్తుతం ఇంగ్లాండ్​లోని ఓ టీ20 లీగ్​లో ఆడుతున్నాడు పాకిస్థాన్ పరిమిత ఓవర్ల కెప్టెన్ బాబర్ అజామ్. సోమర్​సెట్​కు ప్రాతినిధ్యం వహిస్తోన్న ఈ ఆటగాడు తన జెర్సీపై ఆల్కహాల్ బ్రాండ్ లోగోను ధరించి కనిపించాడు. దీనిపై పాక్ అభిమానులు ఆగ్రహం వ్యక్తం చేశారు. దీంతో అతడు వివరణ ఇచ్చాడు.

ఇంగ్లాండ్​ పర్యటనను ముగించుకున్న పాకిస్థాన్​ జట్టు స్వదేశానికి చేరుకుంది. అయితే ఆ జట్టు పరిమిత ఓవర్ల కెప్టెన్ బాబర్ అజామ్ మాత్రం అక్కడ జరిగే టీ20 లీగ్​లో పాల్గొనేందుకు సిద్ధమయ్యాడు. ఈ టోర్నీలో సోమర్​సెట్​కు ప్రాతినిధ్యం వహిస్తున్నాడు బాబర్. అయితే ఆ జట్టు జెర్సీపై ఓ ఆల్కహాల్​కు సంబంధించిన బ్రాండ్ లోగో ఉంది.

తాజాగా ఆ జెర్సీ ధరించిన బాబర్ చిత్రం ఒకటి సామాజిక మాధ్యమాల్లో వైరల్​గా మారింది. దీంతో పాక్ అభిమానులు అతడిపై ఆగ్రహం వ్యక్తం చేశారు. అయితే అది పొరపాటున జరిగిందని.. ఇప్పటికే తాను ఫ్రాంచైజీతో ఆల్కహాల్ బ్రాండ్​ లోగో ఉన్న జెర్సీని ధరించనని ఒప్పందం చేసుకున్నట్లు స్పష్టం చేశాడు బాబర్. తర్వాత మ్యాచ్​లో ఆ లోగో ఉండదని హామీ ఇచ్చాడు.

సోమర్​సెట్​ తరఫున మొదటి మ్యాచ్ ఆడిన బాబర్​ 42 పరుగులతో పాటు స్టన్నింగ్​ క్యాచ్​తో జట్టు గెలుపులో కీలక పాత్ర పోషించాడు.

పాక్ ఆటగాళ్లతో పాటు వేరే దేశాలకు ప్రాతినిధ్యం వహించే ముస్లిం ఆటగాళ్లూ తమ జెర్సీలపై ఆల్కహాల్​కు సంబంధించిన బ్రాండ్​ లోగోలను ధరించడానికి నిరాకరించారు. దక్షిణాఫ్రికా, ఆస్ట్రేలియా, ఇంగ్లాండ్​కు చెందిన ముస్లిం ఆటగాళ్లూ తమ బోర్డులకు నష్టం వచ్చినా.. అలాంటి పని చేయమని ఇప్పటికే స్పష్టం చేశారు.

పాకిస్థాన్​కు చెందిన ముగ్గురు ఆటగాళ్లను ఇంగ్లాండ్ టీ20 లీగ్​లో పాల్గొనేందుకు అనుమతిచ్చింది పీసీబీ. అందులో బాబర్ అజామ్, ఇమాద్ వాసీం, షాహీన్ షా ఉన్నారు.​