శ్రీలంక స్టార్ బ్యాట్స్మన్ కుమార సంగక్కర వంటి వారిపై తన స్పిన్ మాయాజాలంతో ఆధిపత్యం చెలాయించాడు టీమ్ఇండియా స్పిన్నర్ రవిచంద్రన్ అశ్విన్. తన ప్రదర్శన వెనకున్న కారణాలను.. పాకిస్థాన్ జర్నలిస్టు అర్షద్కు ఇచ్చిన ఇంటర్వ్యూలో తాజాగా వెల్లడించాడు.
"మురళీధరన్, అజ్మల్ వంటి స్పిన్నర్లు మిగిలిన వారితో పోలిస్తే ప్రత్యేక బౌలింగ్ శైలిని కలిగిన వారు. అలాంటి వారి బంతులని బ్యాట్స్మెన్ ఎదుర్కొలేకపోయేవారు. వీరిద్దరితో పాటు సునీల్ నరైన్ అలాంటి కోవకి చెందినవాడే. బంతిని గాల్లో కాకుండా చేతిలోనే మాయాజాలం చేయగల నేర్పు తనకు ఉంది. అయితే ముత్తయ్య మురళీధరన్ స్పిన్ను మాత్రం వీరేంద్ర సెహ్వాగ్ బాగా ఆడేవాడు".
-రవిచంద్రన్ అశ్విన్, టీమ్ఇండియా స్పిన్నర్
2015లో భారత్, శ్రీలంక మధ్య జరిగిన టెస్టు సిరీస్ గురించి అశ్విన్ మాట్లాడుతూ.. "నేను చాలా అదృష్టవంతుడిని. ఎందుకంటే అదే సమయంలో నా కెరీర్ నిలకడగా సాగుతోంది. అప్పుడు జరిగిందంతా ఓ కలలాగే ఉంటుంది. ఆ సిరీస్లో మంచి డెలివరీలు వేశాను. మంచి ఫామ్లో ఉన్నాను. ఎడమ వాటం గల బ్యాట్స్మెన్కు బంతులు వేయాలనేది నా కల. శ్రీలంకలో బౌలింగ్ చేయడమంటే నాకు చాలా ఇష్టం. ఎందుకంటే స్పిన్ చేయగలిగేంత పెద్ద మైదానాలు కాకపోయినా.. బంతి బౌన్స్ అవ్వడం సహా కొన్నింటికి అనుకూలంగా ఉంటాయి. కాబట్టి నా కెరీర్లో ఆ దశలో వేసిన బౌలింగ్ను నిజంగా ఆస్వాదించాను. అదే సమయంలో సంగక్కరను బాగా ఇబ్బందిపెట్టా" అని రవిచంద్రన్ అశ్విన్ స్పష్టం చేశాడు.
ఈ సిరీస్లో కుమార సంగక్కరకు 23 బంతులు సంధించి ఏకంగా నాలుగు సార్లు ఔట్ చేసిన ఘనతను అశ్విన్ దక్కించుకున్నాడు. ఆ తర్వాత మురళీధరన్ బౌలింగ్లో కీపింగ్ చేస్తూ.. స్పిన్ గురించి బాగా పట్టుసంపాదించుకున్నట్లు సంగక్కర ఓ ఇంటర్వ్యూలో తెలిపాడు.
