యాషెస్ చివరి టెస్టులో ఇంగ్లాండ్ స్వల్ప ఆధిక్యంలో ఉంది. రెండో రోజు ఆట ప్రారంభించిన ఆస్ట్రేలియా జట్టు 225 పరుగులకే ఆలౌటైంది. జోఫ్రా ఆర్చర్ 6 వికెట్లు తీసి ఆసీస్ను కట్టడి చేశాడు.మొదటి ఇన్నింగ్స్లోఇంగ్లాండ్294 పరుగులు చేసింది.
ఆపద్భాందవుడు స్మిత్...
మొదటి ఇన్నింగ్స్ రెండో రోజు బ్యాటింగ్ ప్రారంభించిన కంగారూ జట్టు ఓపెనర్లు నిరాశపర్చారు. స్టార్ బ్యాట్స్మెన్ డేవిడ్ వార్నర్ (5) మరోసారి ఘోరంగా విఫలమయ్యాడు. మరో ఓపెనర్ హ్యారిస్ (3) వెంటనే ఔటయ్యాడు. వీళ్లిద్దరినీ ఆర్చర్ ఔట్ చేయడం వల్ల ఆసీస్ 14/2తో నిలిచింది. ఈ దశలో స్టీవ్ స్మిత్ 80 పరుగులు (145 బంతుల్లో; 9 ఫోర్లు, 1 సిక్సర్) మరోసారి రాణించాడు.
సిరీస్లో ఇంగ్లాండ్ బౌలర్లకు కొరకరాని కొయ్యలా తయారైన స్మిత్... లబుషేన్ (48)తో కలిసి కీలక భాగస్వామ్యం నెలకొల్పాడు. ఫలితంగా ఆసీస్ 83/2తో పటిష్ఠ స్థితికి చేరుకుంది. అదే సమయంలో లబుషేన్ను ఔట్ చేసి ఈ భాగస్వామ్యాన్ని విడదీశాడు ఆర్చర్. ఆ తర్వాత ఓ ఎండ్లో స్మిత్ పోరాడుతున్నా.. అతడికి సరైన సహకారం అందలేదు. వేడ్ (19), మిచెల్ మార్ష్ (17) ఔటయ్యాక ఆసీస్ పతనం వేగం పుంజుకుంది. 187 పరుగుల వద్ద స్మిత్ 8వ వికెట్ రూపంలో వెనుదిరిగాడు. సిడిల్ (18), లైయన్ (25)ల పోరాటం వల్ల ఆసీస్ 200 మార్కు దాటింది.