రాహుల్ ద్రవిడ్.. ప్రత్యర్థుల విజయానికి అడ్డుగోడ.. టీమిండియాను ఎన్నోసార్లు ఆదుకున్న ఆపద్భాందవుడు. నిప్పులు చెరిగే బంతులేస్తున్నా.. అలవోకగా ఎదుర్కొంటూ.. బౌలర్ల సహనానికి పరీక్ష పెట్టే నేర్పరి. సహచరులంతా పెవిలియన్ బాట పడుతున్నా.. క్రీజులో పాతుకుపోయే ద గ్రేట్ వాల్. క్రికెటర్, కీపర్, కెప్టెన్.. తాజాగా ఎన్సీయే అధ్యక్షుడు ఇలా కీలక బాధ్యతలు నిర్వర్తించిన రాహుల్ ద్రవిడ్ పుట్టినరోజు ఈరోజు. ఈ సందర్భంగా బీసీసీఐ ఓ వీడియోను షేర్ చేసి అతడికి జన్మదిన శుభాకాంక్షలు తెలిపింది.
ద వాల్కు పుట్టినరోజు శుభాకాంక్షలు. ఈ జన్మదినోత్సవాన్ని చాలా ఆనందంగా జరుపుకోవాలని కోరుకుంటున్నాం. టెస్టుల్లో అతడు మేటి బ్యాట్స్మన్ అని అందరికి తెలుసు. న్యూజిలాండ్తో వన్డేలో అతడి 153 పరుగులు స్కోరు ఇప్పుడు చూద్దాం -బీసీసీఐ ట్వీట్
1999లో హైదరాబాద్లో కివీస్తో జరిగిన ఈ మ్యాచ్లో రాహుల్.. 153 పరుగులతో అదరగొట్టాడు. ఇందులో 15 ఫోర్లు రెండు సిక్సర్లు ఉన్నాయి. సచిన్ తెందూల్కర్తో కలిసి 331 పరుగుల భాగస్వామ్యాన్ని నెలకొల్పాడు. భారత్.. 2 వికెట్లు నష్టపోయి 376 పరుగులు చేసింది. ఫలితంగా న్యూజిలాండ్పై 174 పరుగులు భారీ విజయాన్ని అందుకుంది. ఈ మ్యాచ్లో సచిన్ 186 పరుగులతో ఆకట్టుకుని నాటౌట్గా నిలిచాడు.
ద్రవిడ్ గురించి కొన్ని ఆసక్తికర విషయాలు..
- వన్డేల్లో రెండు సార్లు 300కు పైగా భాగస్వామ్యాలు నెలకొల్పిన ఏకైక బ్యాట్స్మన్ ద్రవిడ్. సచిన్ - ద్రవిడ్(331), గంగూలీ-ద్రవిడ్(318).
- 1999 ప్రపంచకప్లో అత్యధిక పరుగులు సాధించిన బ్యాట్స్మన్గా ద్రవిడ్ రికార్డు సృష్టించాడు. ఆ మెగాటోర్నీలో 8 మ్యాచ్ల్లో 65.85 సగటుతో 461 పరుగులు చేశాడు.
- టెస్టుల్లో వరుసగా నాలుగు శతకాలు బాదిన ఏకైక భారత ఆటగాడిగా రికార్డు సృష్టించాడు. 2002లో విండీస్తో మ్యాచ్లో 100 పరుగులు చేయగా.. అనంతరం ఇంగ్లాండ్ పర్యటనలో 114, 148, 127 పరుగులతో వరుసగా నాలుగు సెంచరీలు చేశాడు.
- 2011 ఇంగ్లాండ్ పర్యటనలో ద్రవిడ్ పోరాటం గురించి చెప్పుకొని తీరాల్సిందే. ఈ సిరీస్లో మొత్తం 461 పరుగులతో ఒంటరిగా పోరాడాడు. ఇందులో మూడు శతకాలు ఉన్నాయి. ముఖ్యంగా ఓవల్ టెస్టు తొలి ఇన్నింగ్స్లో మూడో స్థానంలో బ్యాటింగ్కు దిగిన ద్రవిడ్.. జట్టంతా ఔటైనా.. తాను మాత్రం క్రీజులో పాతుకుపోయాడు. మళ్లీ ఫాలోఆన్లోనూ సత్తాచాటాడు. ఈ మ్యాచ్లో 146 పరుగులు చేశాడు ద్రవిడ్. 4-0 తేడాతో సిరీస్ను ఇంగ్లాండ్ క్లీన్ స్వీప్ చేసింది.
- 164 టెస్టులు, 344 వన్డేలు, ఓ టీ20లో భారత తరఫున ప్రాతినిధ్యం వహించాడు ద్రవిడ్. 2012 మార్చిలో అంతర్జాతీయ క్రికెట్కు వీడ్కొలు పలికాడు. కెరీర్లో మొత్తం 48 శతకాలు చేశాడు.
ఇవీ చూడండి.. రాహుల్తో ఆరోగ్యకరమైన పోటీ: ధావన్
