వరద బాధితులకు అండగా కోహ్లీ-అనుష్క

అసోం, బిహార్​ వరదల్లో చిక్కుకున్న ప్రజలకు అండగా ఉంటామని చెప్పారు కోహ్లీ-అనుష్క శర్మ. మూడు స్వచ్ఛంద సంస్థల ద్వారా వారికి అవసరమైన సాయం చేస్తామని స్పష్టం చేశారు.

టీమ్​ఇండియా కెప్టెన్​ కోహ్లీ,​ నటి అనుష్క శర్మ దంపతులు.. అసోం, బిహార్​లలో ఇబ్బందులు ఎదుర్కొంటున్న వరద బాధితులకు అండగా ఉంటామని హామీ ఇచ్చారు. యాక్షన్​ ఎయిర్​ ఇండియా, రాపిడ్​ రెస్పాన్స్​, గూంజ్​ అనే మూడు స్వచ్ఛంద సంస్థలకు సహాయం చేస్తామని, తద్వారా వారికి ఆదుకుంటామని తెలిపారు.

"కరోనాతో దేశం ఓ వైపు పోరాటం చేస్తుండగా, మరోవైపు అసోం, బిహార్​లలో వరదల రావడం బాధకరం. అందులో చిక్కుకున్న వారికి త్వరగా ఉపశమనం కలగాలని ప్రార్థిస్తున్నాం. ఈ వరదల నుంచి ఉపశమనం కోసం కృషి చేస్తున్న మూడు స్వచ్ఛంద సంస్థలతో (యాక్షన్​ ఎయిడ్​ ఇండియా, రాపిడ్​ రెస్పాన్స్​, గూంజ్​) కలిసి వారికి అవసరమైన సహాయాన్ని చేస్తామని ప్రతిజ్ఞ చేస్తున్నాం"

-అనుష్క శర్మ, బాలీవుడ్​ నటి, నిర్మాత

అసోం, బిహార్​ రాష్ట్రాలకు తోచినంత సాయం చేయాలని అభిమానులకు పిలుపునిచ్చారు విరుష్క జోడీ. ఇప్పటివరకు అసోం వరదల్లో 107 మరణించగా.. కొండచరియలు విరిగిపడి 24 మంది చనిపోయారు. బిహార్​లో పరిస్థితి మరింత దయనీయంగా మారింది. 11 మంది తనువు చాలించగా, దాదాపు 40 లక్షల మంది ప్రజలు వరదల్లో చిక్కుకుని బాధపడుతున్నారు.