తొలి టెస్టులో ఇంగ్లాండ్ సారథి జోరూట్‌(218) ద్విశతకం సాధించిన అనంతరం ఆ జట్టు మాజీ ఆల్‌రౌండర్‌ ఆండ్రూ ఫ్లింటాఫ్ బాలీవుడ్ దిగ్గజం అమితాబ్ బచ్చన్కు చురకంటించాడు. ఐదేళ్ల క్రితం ఫ్లింటాఫ్ చేసిన ఓ ట్వీట్‌కు అమితాబ్ ఓ వ్యంగ్యాస్త్రం సంధించిన నేపథ్యంలో ఇప్పుడు సరదాగా ప్రతీకారం తీర్చుకున్నాడు. శనివారం అమితాబ్‌ను గౌరవిస్తూనే ఫ్లింటాఫ్ వినసొంపుగా ఎద్దేవా చేశాడు.
2016 టీ20 ప్రపంచకప్‌ సందర్భంగా టీమ్ఇండియా ఆస్ట్రేలియాను ఓడించి సెమీ ఫైనల్‌కు చేరింది. ఆరోజు విరాట్‌ కోహ్లీ (82*; 51 బంతుల్లో 9x4, 2x6) కెరీర్‌లోనే చెప్పుకోదగ్గ ఇన్నింగ్స్‌ ఆడి మ్యాచ్‌ను గెలిపించాడు. దాంతో ఫ్లింటాఫ్.. కోహ్లీ బ్యాటింగ్‌ను ప్రశంసిస్తూ వివాదాస్పద వ్యాఖ్యలు చేశాడు. 'అతడు ఇలాగే కొనసాగితే ఏదో ఒక రోజు జో రూట్‌లా అద్భుతమైన ఆటగాడిగా మారుతాడు' అని ట్వీట్‌ చేశాడు. దానికి స్పందించిన అమితాబ్ 'రూట్ ఎవరు?నాకు తెలియదు. అయినా టీమ్ఇండియా అతడిని కూకటివేళ్లతో పెకిలిస్తుంది' అని రిప్లై ఇచ్చారు.