బీసీసీఐ చెప్పిందని మారుస్తారా: బోర్డర్

భారత్-ఆస్ట్రేలియా న్యూ ఇయర్ టెస్టు తేదీ మార్పుపై అలెన్ బోర్డర్​ స్పందించాడు. బీసీసీఐ చెప్పిందని మార్చుతారా అని ఆస్ట్రేలియా బోర్డును ప్రశ్నించాడు.

భారత్‌, ఆస్ట్రేలియా జట్ల మధ్య టెస్టు సిరీస్‌ షెడ్యూల్‌లో మార్పులను దిగ్గజ ఆటగాడు అలెన్‌ బోర్డర్‌ తప్పుబట్టాడు. బీసీసీఐ ముందు క్రికెట్‌ ఆస్ట్రేలియా (సీఏ) తలవంచిందని విమర్శించాడు.

సాధారణంగా సిడ్నీలో జరిగే మ్యాచ్‌ను న్యూ ఇయర్‌ టెస్టుగా పరిగణిస్తారు. జనవరి మొదటి వారంలో ఈ టెస్టు ప్రారంభమవుతుంది. బాక్సింగ్‌ డే టెస్టు (డిసెంబరు 26-30)కు న్యూ ఇయర్‌ మ్యాచ్‌ (జనవరి 3-7)కు మధ్య మూడు రోజుల విరామం ఉంటుంది. అయితే బీసీసీఐ విజ్ఞప్తి మేరకు జనవరి 7న మ్యాచ్‌ మొదలయ్యేలా ప్రతిపాదిత షెడ్యూల్‌ను సీఏ తయారు చేసినట్లు కథనాలు వచ్చాయి. ఇరు దేశాల బోర్డులు ఈ ప్రతిపాదిత షెడ్యూల్‌కు ఇంకా ఆమోదముద్ర వేయలేదు.

"ప్రపంచవ్యాప్తంగా ఉన్న పరిస్థితుల దృష్ట్యా ఈ నిర్ణయం తీసుకుంటే సరే. కానీ ఆ సమయంలో కొన్ని రోజులు విరామం కావాలన్న భారత్‌ కోరిక మేరకు ఇలా చేస్తే మాత్రం సరికాదు" అని బోర్డర్‌ పేర్కొన్నాడు.