వరుసగా రెండో ఏడాది 'ముస్తాక్ అలీ' కర్ణాటకదే

సూరత్​ వేదికగా జరిగిన ముస్తాక్ అలీ ట్రోఫీ ఫైనల్లో కర్ణాటక విజయం సాధించింది. వరుసగా రెండో ఏడాది విజేతగా నిలిచి.. ఈ ఘనత సాధించిన తొలి జట్టుగా అవతరించింది.

ఆదివారం జరిగిన ముస్తాక్ అలీ ట్రోఫీ తుదిపోరులో కర్ణాటక విజేతగా నిలిచింది. తమిళనాడుపై 1 పరుగు తేడాతో విజయం సాధించింది. వరుసగా రెండో ఏడాది ట్రోఫీ నిలబెట్టుకుంది. ఈ ఘనత సాధించిన తొలి జట్టుగా నిలిచింది. ఒకే ఏడాది విజయ్ హజారే, సయ్యద్ ముస్తాక్ అలీ ట్రోఫీలు గెల్చుకున్న మొదటి టీమ్​గా నిలిచింది.

ఈ మ్యాచ్​లో తొలుత బ్యాటింగ్ చేసిన కర్ణాటక.. నిర్ణీత 20 ఓవర్లలో 5 వికెట్ల నష్టానికి 180 పరుగులు చేసింది. కెప్టెన్ మనీశ్ పాండే 60 పరుగులతో రాణించాడు. మిగతా వారిలో కేఎల్​ రాహుల్ 22, దేవదూత్ 32, రోహన్ కడమ్ 35 పరుగులతో ఆకట్టుకున్నారు.

అనంతరం ఛేదనలో తమిళనాడు.. నిర్ణీత ఓవర్లలో 6 వికెట్ల నష్టానికి 179 పరుగులు చేసింది. షారుక్ ఖాన్ 16, హరి నిశాంత్ 14, వాషింగ్టన్ సుందర్ 24, దినేశ్ కార్తిక్ 20, బాబా అపరాజిత్ 40, విజయ్ శంకర్ 44 పరుగులు చేశారు. కానీ జట్టుకు విజయం అందించలేకపోయారు.