2010లో లార్డ్స్‌ టెస్టు సందర్భంగా బయటపడ్డ పాకిస్థాన్ క్రికెటర్ల స్పాట్ ఫిక్సింగ్ కుంభకోణం ప్రపంచ క్రికెట్ను షాక్కు గురిచేసింది. ఇందులో దోషులుగా తేలిన సల్మాన్‌ బట్‌, మహ్మద్‌ ఆసిఫ్‌, మహ్మద్‌ ఆమిర్‌ నిషేధానికి గురయ్యారు. అయితే ఈ కుంభకోణానికి ముందు తమ ఆటగాళ్లకు, బుకీ మజీద్‌కు మధ్య సంక్షిప్త సందేశాలు నడిచాయని... ఆ సంగతి తనకు ముందే తెలుసని అఫ్రిది తన ఆత్మకథ ‘గేమ్ చేంజర్’లో వెల్లడించాడు.
అఫ్రిది 'గేమ్ చేంజర్'లో స్పాట్ ఫిక్సింగ్
పాకిస్థాన్ మాజీ ఆటగాడు అఫ్రిది రోజుకో విషయంతో సంచలనం సృష్టిస్తున్నాడు. మొదట తన అసలు వయసు వెల్లడించిన దాయాది ఆటగాడు... తర్వాత గంభీర్పై విమర్శలు గుప్పించాడు. తాజాగా పాకిస్థాన్ క్రికెట్లో ఫిక్సింగ్ కుంభకోణం గురించి వివరించాడు.
అఫ్రిది 'గేమ్ చేంజర్'లో స్ఫాట్ ఫిక్సింగ్
ఆటగాళ్లకు ఏజెంట్‌గా వ్యవహరించిన మజీద్‌ ఫోన్‌ పాడైతే లండన్‌లో రిపేర్‌ కోసం ఇచ్చాడని... అయితే ఆ షాపు యజమానికి తనతో పరిచయం ఉండటంతో అందులోని కీలక సందేశాలు తనకు పంపించాడని వెల్లడించాడు. తమ జట్టులోని ఆటగాళ్లతో ఫిక్సింగ్ గురించి మజీద్‌ చర్చిస్తున్న సంగతి అప్పుడే తనకు అర్థమైందని అఫ్రిది చెప్పాడు. ఆ విషయం కోచ్‌ వకార్‌ యూనిస్‌కు చేరవేస్తే.. అతను ఉన్నతాధికారులకు నివేదించలేకపోయాడని అన్నాడు. చివరికి విషయం అంత తీవ్రతరమౌతుందని ఊహించలేదని వెల్లడించాడు అఫ్రిది.