రాజ్కోట్లో ఆస్ట్రేలియాతో జరుగుతున్న రెండో వన్డేలో భారత్.. 6 వికెట్ల నష్టానికి 340 పరుగులు చేసింది. శిఖర్ ధావన్(96), విరాట్ కోహ్లీ(78) అర్ధశతకాలతో చెలరేగగా.. చివర్లో రాహుల్ 80 పరుగులతో మెరిశాడు. ఆసీస్ బౌలర్లలో ఆడం జంపా 3 వికెట్లు తీశాడు. కేన్ రిచర్డ్సన్ 2 వికెట్లు పడగొట్టాడు.
శుభారంభం
టాస్ ఓడి బ్యాటింగ్కు దిగిన టీమిండియాకు ఓపెనర్లు శుభారంభం అందించారు. శిఖర్ ధావన్ - రోహిత్ శర్మ.. తొలి వికెట్కు 81 పరుగుల భాగస్వామ్యం నమోదు చేశారు. మొదట ధావన్ బ్యాట్ ఝుళిపించగా.. అనంతరం రోహిత్ శర్మ(42) వేగంగా ఆడాడు. ధాటిగా బ్యాటింగ్ చేసే ప్రయత్నంలో జంపా బౌలింగ్ ఎల్బీడబ్ల్యూగా వెనుదిరిగాడు.
ధావన్ శతకం మిస్
హిట్ మ్యాన్ ఔటైనా.. ధావన్ మాత్రం తగ్గలేదు. విరాట్ సాయంతో కీలక ఇన్నింగ్స్ ఆడాడు. వీరిద్దరూ, రెండో వికెట్కు 103 పరుగుల భాగస్వామ్యం నమోదు చేశారు. 60 బంతుల్లో హాఫ్ సెంచరీ పూర్తి చేసుకున్న గబ్బర్.. ఆ తర్వాత మరింత రెచ్చిపోయాడు. అగర్ బౌలింగ్లో సిక్సర్, ఫోర్ కొట్టి 90ల్లో అడుగుపెట్టాడు. సెంచరీకి 4 పరుగులు ఉందనగా రిచర్డ్సన్ బౌలింగ్లో వెనుదిరిగాడు. ఇతడి ఇన్నింగ్స్లో 13 ఫోర్లు, ఓ సిక్సర్ ఉంది.
మెరుపులు మెరిపించిన రాహుల్
కాసేపటికే అయ్యర్ కూడా ఔట్ కాగా.. మరో వికెట్ పడకుండా జాగ్రత్తగా ఆడారు కోహ్లీ, రాహుల్. వేగంగా ఆడే ప్రయత్నంలో జంపా బౌలింగ్లో బౌండరీ లైన్లో క్యాచ్ ఇచ్చి వెనుదిరిగాడు కోహ్లీ. చివర్లో కేఎల్ రాహుల్ వీరవిహారం సృష్టించాడు. ఫోర్లు, సిక్సర్లతో ఆసీస్ బౌలర్లపై విరుచుకుపడ్డాడు. రాహుల్కు జడేజా(19) తోడవడం వల్ల టీమిండియా భారీ స్కోరు సాధించింది. ముఖ్యంగా కేఎల్ రాహుల్ ఆఫ్సైడ్ సిక్సర్లతో అదరగొట్టాడు. భీకర ఫామ్లో ఉన్న రాహుల్ 5వ స్థానంలో బ్యాటింగ్కు వచ్చినప్పటికీ తనదైన శైలిలో విధ్వంసం సృష్టించాడు.
ఇదీ చదవండి: త్రుటిలో శతకం చేజార్చుకున్న శిఖర్
