సెంచూరియన్‌ వేదికగా దక్షిణాఫ్రికా-ఇంగ్లాండ్ టీ20 మ్యాచ్ మరోసారి మజానిచ్చింది. తొలి రెండు మ్యాచ్ల్లాగే ఇరుజట్లు పోటాపోటీగా తలపడ్డాయి. అయితే కీలక సమయంలో బ్యాట్కు పనిచెప్పిన ఇంగ్లాండ్ ఆటగాళ్లు... నిర్ణయాత్మక పోరును వన్సైడ్ చేశారు.
28 సిక్సర్ల మోత..
అప్పటికి ఇంగ్లాండ్ గెలవాలంటే 24 బంతుల్లో 53 పరుగులు కావాలి. ఈ దశలో మోర్గాన్, స్టోక్స్‌ విరుచుకుపడ్డారు. కళ్లు చెదిరే షాట్లతో 17, 18, 19 ఓవర్లలో మొత్తం 52 పరుగులు రాబట్టారు. దూకుడుగా ఆడే క్రమంలో స్టోక్స్‌ అవుటైనా మోర్గాన్ వరుస సిక్సర్లతో.. సఫారీ బౌలర్లను బెంబేలెత్తించాడు. ఫలితంగా ఈ పోరులో ఐదు వికెట్లతో సులువుగా గెలిచింది ఇంగ్లాండ్ జట్టు. అంతేకాకుండా మూడు మ్యాచ్ల పొట్టి సిరీస్ను 2-1 తేడాతో కైవసం చేసుకుంది.
ఆదివారం జరిగిన ఈ మ్యాచ్లో టాస్‌ నెగ్గి మొదట బ్యాటింగ్‌ చేసిన దక్షిణాఫ్రికా 20 ఓవర్లలో 6 వికెట్ల నష్టానికి 222 పరుగులు చేసింది. క్లాసెన్‌ 66(33 బంతుల్లో; 4 ఫోర్లు, 4 సిక్సర్లు), బవుమా 49(24 బంతుల్లో; 4 ఫోర్లు, 3 సిక్సర్లు), డికాక్‌ 35(24 బంతుల్లో; 1 ఫోర్‌, 4 సిక్సర్లు), మిల్లర్‌ 35*(20 బంతుల్లో; 3 ఫోర్లు, 2 సిక్సర్లు) సత్తా చాటారు. ఇంగ్లాండ్ బౌలర్లలో కరన్‌, స్టోక్స్‌ చెరో రెండేసి వికెట్లు పడగొట్టారు.
భారీ లక్ష్య ఛేదనలో ఓపెనర్‌ జేసన్‌ రాయ్‌ (7) వికెట్‌ను ఇంగ్లండ్‌ త్వరగా కోల్పోయింది. కానీ బెయిర్‌ స్టో 64(34 బంతుల్లో; 7 ఫోర్లు, 3 సిక్సర్లు), కెప్టెన్‌ మోర్గాన్ 57*(22 బంతుల్లో; 7 సిక్సర్లు), బట్లర్‌ 57(29 బంతుల్లో; 9 ఫోర్లు, 2 సిక్సర్లు) చెలరేగారు. వారికి స్టోక్స్‌ 22(12 బంతుల్లో; 1ఫోర్‌, 2 సిక్సర్లు) ధాటి ఇన్నింగ్స్‌ తోడుకావడం వల్ల ఐదు బంతులు మిగిలి ఉండగానే.. 5 వికెట్ల తేడాతో విజయం అందుకుంది ఇంగ్లాండ్ జట్టు. సఫారీ బౌలర్లలో ఎంగిడి 2 వికెట్లు, ఫెలుక్వాయో, షంసీ, ప్రిటోరియస్ తలో వికెట్ ఖాతాలో వేసుకున్నారు.
మోర్గాన్కు.. 'మ్యాన్‌ ఆఫ్‌ ది మ్యాచ్', 'మ్యాన్‌ ఆఫ్‌ ది సిరీస్' అవార్డులు దక్కాయి. మొత్తం ఈ మ్యాచ్లో 28 సిక్సర్లు నమోదయ్యాయి. అంతేకాకుండా ఛేజింగ్లో ముగ్గురు ఆటగాళ్లు అర్ధశతకాలు చేయడం విశేషం.
