2021 ప్రపంచకప్​ ఫైనల్​ ఎక్కడో తెలుసా..?

న్యూజిలాండ్​ వేదికగా 2021లో మహిళల వన్డే ప్రపంచకప్ జరగనుంది. ఇప్పటివరకు ఈ మెగాటోర్నీ ఫైనల్ ఎప్పుడు,​ ఎక్కడ నిర్వహించాలనేది సందిగ్ధంగా మారింది. తాజాగా  టైటిల్​ పోరు జరిగే వేదికపై స్పష్టత ఇచ్చింది ఐసీసీ. క్రైస్ట్​చర్చ్​లోని హాగ్లే ఓవల్​​ స్టేడియం ఈ మ్యాచ్​కు ఆతిథ్యమిస్తుందని వెల్లడించింది.

వచ్చే ఏడాది మహిళా దినోత్సవం ముందు రోజున రెండు జట్లు ప్రపంచకప్​ కోసం తలపడనున్నాయి. మహిళల వన్డే ప్రపంచకప్​ ఫైనల్​ మార్చి 7న జరగనుంది. న్యూజిలాండ్​లోని క్రైస్ట్​చర్చ్​ హగ్లే ఓవల్​ మైదానంలో ఈ టైటిల్​ పోరు జరగనుంది. గురువారం ఈ మేరకు తేదీ, వేదిక ప్రకటించింది ఐసీసీ.

ఈ 50 ఓవర్ల సంగ్రామం వచ్చే ఏడాది ఫిబ్రవరి 6 నుంచి మార్చి 7 వరకు జరగనుంది. మొత్తం ఆరు నగరాల్లోని మైదానాల్లో ఈ మ్యాచ్​లు నిర్వహించనున్నారు. ఆక్లాండ్​లోని ఈడెన్​ పార్క్​లో ఘనంగా టోర్నీ ఆరంభం కానుంది. ఆ తర్వాత వెల్లింగ్టన్​, హామిల్టన్​, టౌరంగ, డునెడిన్​, క్రైస్ట్​చర్చ్​ వేదికలపై మ్యాచ్​లు జరగనున్నాయి. 1982లో తొలిసారి మహిళల ప్రపంచకప్​ ఫైనల్​కు ఆతిథ్యమిచ్చింది క్రైస్ట్​చర్చ్​. ఆ తర్వాత 1973, 1978 ఎడిషన్లలో లీగ్​ మ్యాచ్​లు మాత్రమే ఇక్కడ జరిగాయి. తాజా నిర్ణయంతో రెండోసారి ప్రపంచకప్​ తుది పోరుకు వేదికైంది.

ఈ మైదాన సామర్థ్యం 20 వేలు. మొత్తం 31 మ్యాచ్​లు జరగనున్నాయి. ఇందులో ఫైనల్​ను డే/నైట్​ రూపంలో నిర్వహించనున్నారు. ఈ మెగాటోర్నీలో 8 జట్లు పాల్గొననున్నాయి.