చెన్నై జట్టులోని భారత యువ బౌలర్​కు కరోనా

చెన్నై జట్టులోని 10 మందికి పైగా కరోనా ఉన్నట్లు తేలింది. దీంతో సభ్యులందరినీ క్వారంటైన్​కు పంపించారు. ఈ విషయాన్ని ఐపీఎల్ అధికారి ఒకరు వెల్లడించారు.

ఐపీఎల్​లో ఆడేందుకు దుబాయ్​లో అడుగుపెట్టిన చెన్నై సూపర్​కింగ్స్​లో కరోనా కలకలం సృష్టించింది. టీమ్​ఇండియాకు పరిమిత ఓవర్ల ఫార్మాట్​లో ప్రాతినిధ్యం వహిస్తున్న ఓ బౌలర్​తో పాటు 10-12 మంది సహాయ సిబ్బందికి వైరస్​ పాజిటివ్​గా తేలింది. దీంతో మరో వారం రోజుల పాటు జట్టు సభ్యులందరూ క్వారంటైన్​లో ఉండనున్నారు. వీళ్లతోపాటే సీఎస్కే మేనేజ్​మెంట్ సీనియర్ అధికారి, ఆయన భార్య, సోషల్ మీడియా బృందంలోని ఇద్దరికి కరోనా సోకినట్లు ఐపీఎల్ అధికారి తెలిపారు. వారం తర్వాత చెన్నై జట్టులోని అందరికీ మరోసారి వైద్యపరీక్షలు నిర్వహిస్తారు. అందులో నెగటివ్​గా తేలిన తర్వాతే బయో బబుల్​లోకి అనుమతిస్తారు.

హోటల్​లో ఉన్న చెన్నై జట్టు సభ్యులు

కరోనా వ్యాప్తి ఎక్కువవుతున్న కారణంగా ఈ ఐపీఎల్ సీజన్​ను దుబాయ్​లో జరపాలని బీసీసీఐ నిర్ణయం తీసుకుంది. సెప్టెంబరు 19 నుంచి జరిగే లీగ్​ కోసం దాదాపు నెల ముందుగానే క్రికెటర్లందరూ అక్కడికి చేరుకున్నారు. వీరికి ఆరు రోజులు క్వారంటైన్​లో ఉంచి మూడుసార్లు వైద్యపరీక్షలు జరిపారు. ఇందులో నెగటివ్​ వచ్చిన ఆటగాళ్లు శిక్షణ శిబిరంలో పాల్గొంటారు. వైరస్​ ఉన్నట్లు తేలితో బోర్డు నిబంధనల ప్రకారం మరో వారం రోజులు నిర్బంధంలో ఉండాలి.