టీమ్‌ఇండియా ఆల్‌రౌండర్‌ రవీంద్ర జడేజాకు ఇటీవలే మోకాలికి శస్త్రచికిత్స జరిగింది. దీంతో టీ20 ప్రపంచకప్‌కు దూరమయ్యాడు. ప్రస్తుతం విశ్రాంతి తీసుకుంటున్నాడు. ఈ క్రమంలోనే జడేజా వేగంగా కోలుకోవాలంటూ యువ క్రికెటర్ చేతన్‌ సకారియా వినూత్న శైలిలో ట్వీట్‌ చేశాడు. జడ్డూ ఏదైనా మ్యాచ్‌లో అర్ధ శతకం, శతకం బాదినప్పుడు తన బ్యాట్ను కత్తిలా తిప్పుతాడు. ఈ సిగ్నేచర్‌ స్టైల్‌లోనే సకారియా సైతం ఒంటి చేత్తో బ్యాట్ తిప్పుతోన్న ఓ వీడియోను పోస్ట్‌ చేశాడు.
'జడ్డూ భాయ్‌ను మిస్‌ అవుతున్నట్లయితే.. ఇది చూడండి. జడేజా త్వరగా కోలుకోవాలని ఆకాంక్షిస్తున్నా' అని ఈ యంగ్‌ పేసర్‌ రాసుకొచ్చాడు. దీనిపై జడేజా సైతం స్పందించాడు. అతని ప్రయత్నాన్ని మెచ్చుకుంటూ.. 'హహా.. వెల్‌డన్‌' అంటూ కామెంట్‌ పెట్టాడు. ఈ వీడియో ఇప్పుడు క్రికెట్‌ అభిమానులను ఆకట్టుకుంటోంది. ఇదిలా ఉండగా.. ఇటీవల ఆసియా కప్‌లో మొదటి రెండు మ్యాచ్‌ల అనంతరం మోకాలి గాయం కారణంగా జడేజా ఆ టోర్నీకి దూరమయ్యాడు. ఇటీవల ప్రకటించిన టీ-20 ప్రపంచ కప్ భారత జట్టులోనూ స్థానం కోల్పోయాడు.