బోర్డర్-గావస్కర్ ట్రోఫీ తొలి టెస్టులో ఆస్ట్రేలియాపై భారత్‌ ఘన విజయం సాధించింది. ఇన్నింగ్స్‌ 132 పరుగుల తేడాతో కంగారూలను చిత్తు చిత్తుగా ఓడించింది. 321/7 (తొలి ఇన్నింగ్స్‌) ఓవర్‌నైట్‌ స్కోరుతో మూడో రోజు ఆటను ప్రారంభించిన భారత్‌.. మరో 79 పరుగులు జోడించి 400 పరుగులకు ఆలౌటైంది. ఈ క్రమంలో 223 పరుగుల ఆధిక్యాన్ని సంపాదించింది. అశ్విన్(5), జడేజా(2), అక్షర్‌(1) స్పిన్‌ ధాటికి రెండో ఇన్నింగ్స్‌లో ఆసీస్ 91 పరుగులకే కుప్పకూలింది. చివర్లో షమి రెండు వికెట్లు తీశాడు. ఆసీస్ బ్యాటర్లలో స్టీవ్‌ స్మిత్‌ (25*) టాప్‌ స్కోరర్‌.
అంతకుముందు.. ఆస్ట్రేలియా తొలి ఇన్నింగ్స్‌: 177. భారత్‌ తొలి ఇన్నింగ్స్‌: 400. ఇక, తొలి ఇన్నింగ్స్‌లో (3/42)తో ఆకట్టుకున్న అశ్విన్.. రెండో ఇన్నింగ్స్‌లో (5/37).. తన స్పిన్‌ మాయాజాలంతో ఆసీస్ బ్యాటర్లను ఉక్కిరిబిక్కిరి చేశాడు. మొదటి ఇన్నింగ్స్‌లో (5/47)తో అదరగొట్టిన జడేజా.. రెండో ఇన్నింగ్స్‌లో రెండు వికెట్లు పడగొట్టాడు. ఈ మ్యాచ్లో భారత స్పిన్నర్లు 16 వికెట్లు పడగొట్టారు. కాగా, ఈమ్యాచ్‌లో షమీ ఓ అరుదైన ఫీట్‌ సాధించాడు. టెస్టు క్రికెట్‌లో 25 సిక్సులతో ఫుల్‌ టైం బ్యాటర్‌ కోహ్లీ(24 సిక్సులు)ని అధిగమించాడు.