Big Bash League 2023 : ప్రపంచ క్రికెట్ చరిత్రలో ఇండియన్ ప్రీమియర్ లీగ్ తర్వాత ఆ స్థాయిలో క్రీడా అభిమానుల ఆదరణ పొందింది బిగ్ బాష్ లీగ్. ఇందులో భారత్‌ మినహా వివిధ దేశాల స్టార్ క్రికెటర్లు కూడా సందడి చేస్తారు. ఆస్ట్రేలియా వన్డే, టీ20 జట్ల సభ్యుల్లో దాదాపు అందరూ ఈ లీగ్లో పాల్గొంటారు. దేశవాళీ క్రికెటర్లు కూడా ఆడతారు.
ప్రతి ఏడాదిలాగే ఈసారి కూడా ఆస్ట్రేలియా క్రికెట్ బోర్డు బిగ్ బాష్ లీగ్ను అట్టహాసంగా ప్రారంభించేందుకు సన్నాహాలు చేస్తోంది. అయితే మ్యాచ్ల షెడ్యూల్ను నిర్వాహకులు తగ్గించారు. ఈ విషయాన్ని క్రికెట్ ఆస్ట్రేలియా.. శుక్రవారం ప్రకటించింది. దీంతో ఇక నుంచి ఏడాదికి ఒక ఫ్రాంఛైజీ గరిష్ఠంగా 10 మ్యాచ్లు మాత్రమే ఆడే అవకాశం ఉంది.
తొలుత ఈ కొత్త మార్పులను వచ్చే ఏడాది నుంచి అమలు చేయాలని భావించినప్పటికీ.. బ్రాడ్‌కాస్టర్లతో కుదిరిన ఒప్పందం మేరకు ఈ ఏడాది నుంచే షెడ్యూల్ తగ్గించాలని నిర్ణయాన్ని తీసుకున్నారు. బిగ్ బాష్ లీగ్ షెడ్యూల్ చాలా ఎక్కువగా ఉందన్న విమర్శలను ఎదుర్కొన్న నేపథ్యంలో నిర్వాహకులు ఈ నిర్ణయం తీసుకున్నట్లు సమాచారం. దీని వల్ల ఈ సీజన్లో 56కు బదులు 40 మ్యాచ్లే జరగనున్నాయి.
Big Bash League Play offs : మరోవైపు లీగ్లోని ప్లేఆఫ్స్ విధానాన్ని కూడా మార్చనున్నారు నిర్వాహకులు. ఇన్నాళ్లూ ఐదు టీమ్స్ ప్లేఆఫ్స్కు అర్హత సాధిస్తుండగా.. ఇక నుంచి కేవలం నాలుగు టీమ్స్ మాత్రమే ప్లేఆఫ్స్కు క్వాలిఫై కానున్నాయి. ఈ ఏడాది జులైలో టోర్నీ షెడ్యూల్ అనౌన్స్ చేసేందుకు సన్నాహాలు చేస్తుండగా.. డిసెంబర్లో ఈ లీగ్ ప్రారంభం కానుంది. అంతే కాకుండా షెడ్యూల్ తగ్గించడం వల్ల ఇక నుంచి బిగ్ బాష్ లీగ్ మొత్తం మ్యాచ్లు డిసెంబర్ సెలవుల్లోనే పూర్తి కానుంది. దీనివల్ల అత్యధిక మ్యాచ్లకు విదేశీ ప్లేయర్స్ అందుబాటులో ఉండేలా కూడా బిగ్ బాష్ నిర్వాహకులు ప్లాన్ చేస్తున్నారు.
గతేడాది జరిగిన బిగ్బాష్ లీగ్ ఫైనల్స్లో ఆస్ట్రేలియాకు చెందిన పెర్త్ స్కార్చర్స్ టీమ్ ఘన విజయాన్ని సాధించింది. సిడ్నీ సిక్సర్స్ టీమ్ను 79 పరుగుల తేడాతో చిత్తుగా ఓడించింది. నాలుగో సారి టైటిల్ను కైవసం చేసుకుంది. పెర్త్ స్కార్చర్స్ ఆటగాడు లారీ ఇవాన్స్ 76 పరుగులతో జట్టు విజయంలో కీలక పాత్ర పోషించాడు. ప్లేయర్ ఆఫ్ ది మ్యాచ్గా కూడా ఇవాన్స్ నిలవడం విశేషం.
