'బెస్ట్ ఫీల్డర్' గా​ శ్రేయస్​​ - మాస్టర్​ బ్లాస్టర్​ అనౌన్స్​మెంట్​

Best Fielder Award : గురువారం వాంఖడే మైదానంలో శ్రీలంకతో జరిగిన మ్యాచ్​లో టీమ్ఇండియా అదరగొట్టింది. ఆల్​రౌండ్ ప్రదర్శనతో లంకను చిత్తుచేసింది. ఈ క్రమంలో స్టార్ బ్యాటర్ శ్రేయస్​ అయ్యర్.. బెస్ట్ ఫీల్డర్ ఆఫ్​ ది మ్యాచ్​​గా నిలిచాడు.

Best Fielder Award : సొంతగడ్డపై జరుగుతున్న ప్రపంచకప్​లో.. భారత్ తిరుగులేని ప్రదర్శనను కనబరుస్తోంది. ఒకవైపు బ్యాటర్లు అదరగొడుతుంటే.. మరోవైపు బౌలర్లు విజృంభిస్తున్నారు. ఈ రెండిటిలోనే కాకుండా ఫీల్డింగ్​లోనూ టీమ్ఇండియా ఆటగాళ్లు రాణిస్తున్నారు. ఈ క్రమంలోనే టీమ్ఇండియా స్టార్ బ్యాటర్ శ్రేయస్​ అయ్యర్ బెస్ట్​ ఫీల్డర్​ అవార్డు అందుకున్నాడు.

రాహుల్​ చేతుల మీదుగా.. గురువారం శ్రీలంకతో జరిగిన మ్యాచ్​లో అయ్యర్​.. మైదానంలో చురుగ్గా స్పందించాడు. మొదట బ్యాట్​తో (82 పరుగులు) అదరగొట్టిన అతడు.. సెకండ్ ఇన్నింగ్స్​లో ఫీల్డింగ్​లోనూ తన మార్క్​ చూపించాడు. గ్రౌండ్​లో చురుగ్గా కదులుతూ.. సింగిల్స్​ కూడా తీయనీయకుండా, బంతిని బౌండరీ వెళ్లకుండా అద్భుతమైన ఫీల్డింగ్ విన్యాసాలు చూపాడు. దీంతో టీమ్ఇండియా ఫీల్డింగ్​ కోచ్​ టీ.దిలీప్.​. శ్రేయస్​ అయ్యర్​ను 'ఫీల్డర్​ ఆఫ్​ ది మ్యాచ్'​గా ఎంపికచేశాడు. ఈ అవార్డు విజేతను సచిన్ తెందూల్కర్​ ప్రకటించాడు. టీమ్ఇండియా బ్యాటర్​ కేఎల్​ రాహుల్​.. అయ్యర్​కు మెడల్​ను అందించాడు.

శ్రేయస్​ అయ్యర్​, కే.ఎల్​ రాహుల్​

సచిన్ నోట శ్రేయస్​ పేరు..శ్రేయస్​కు అందించే బెస్ట్ ఫీల్డర్​ అవార్డును స్వయంగా క్రికెట్​ లెజెండ్​ సచిన్ తెందూల్కర్​ నోటితో చెప్పించాడు ఫీల్డింగ్ కోచ్ దిలీప్. డ్రెస్సింగ్​ రూమ్​లోనే ఏర్పాటు చేసిన ఎల్​ఈడీ టీవీలో సచిన్​ మాట్లాడిన వీడియోను ప్లే చేశారు. ఈ వీడియోలో​.. 'నిన్న ఆడిన మ్యాచ్​లో చాలా అద్భుతంగా ఆడారు. అంతకుముందు రోహిత్​ నాతో బెస్ట్​ ఫీల్డర్​ మెడల్​ గురించి మాట్లాడాడు. ఆ సమయంలో నేను 2003 లో జరిగిన ప్రపంచకప్​ గురించి గుర్తుచేసుకున్నాను. సరిగ్గా 20 ఏళ్ల క్రితం మేము దక్షిణాఫ్రికాలో ఆడుతున్నాము. అక్కడ ఒక చార్ట్​ ఉండేది. ఈ చార్ట్​లో 'ఐ క్యాన్​.. వి క్యాన్​'(I Can, We Can) అని రాసి ఉండేది. దానిపై ప్రతిఒక్క ఆటగాడు సంతకం చేసే మైదానంలోకి దిగాలి. ఇదంతా ఆటగాడి కమిట్​మెంట్​ను సూచిస్తుంది. దీని అర్థం నేను 100 శాతం నా దేశం కోసం, నా టీమ్​ కోసం ఆడుతున్నాను అని చెబుతుంది. ప్రస్తుతం ఉన్న టీమ్​ఇండియా ఇదే పని చేస్తుంది. ఇప్పటివరకు మీరు ఆడిన ప్రతి మ్యాచ్​ను నేను ఎంజాయ్​ చేశాను. చాలా అద్భుతం. ఈ ఫామ్​ను ఇలానే కొనసాగించండి. ఆల్​ ది బెస్ట్​' అంటూ అక్కడే ఉన్న ఆటగాళ్లను అభినందించాడు సచిన్​. ఇక చివరగా 'బెస్ట్ ఫీల్డర్ ఆఫ్​ ది మ్యాచ్​​' అవార్డ్​ను శ్రేయస్​ అయ్యర్​ గెలుచుకున్నట్లుగా ప్రకటించాడు సచిన్​.