ఉమెన్స్ ప్రీమియర్ లీగ్ 2023 కి సర్వం సిద్ధమయ్యింది. ఇప్పటికే జట్లతో పాటు సభ్యుల వివరాలను వెల్లడించిన బీసీసీఐ తాజాగా ప్రీమియర్ లీగ్ మస్కట్ను ఆవిష్కరించింది. 'శక్తి' అనే ఓ పులి బొమ్మను మస్కట్గా తెలుపుతూ బీసీసీఐ సెక్రటరీ జై షా ఓ వీడియోను రిలీజ్ చేశారు. 'శక్తి రంగంలోకి దిగడానికి సిద్ధంగా ఉంది. ఇది ప్రారంభం మాత్రమే' అని రాసుకొచ్చారు. బ్లూ కలర్ జెర్సీ వేసుకున్న ఆ అందాల పులి బొమ్మ క్రికెట్ బ్యాట్ చేతబట్టి స్టేడియంలో విజృంభించింది. డబ్ల్యూపీఎల్కు ఈ మస్కట్ మరింత వన్నె తెచ్చింది. కాగా క్రికెట్ చరిత్రలో తొలిసారి మహిళల ప్రీమియర్ లీగ్ జరగనుంది.
ముంబయి వేదికగా మార్చి 4 నుంచి 26 వరకు జరగనున్న ఈ తొలి సీజన్ కప్ కోసం ఐదు జట్లు తలపడనున్నాయి. ముంబయి ఇండియన్స్, రాయల్ ఛాలెంజర్స్ బెంగళూరు,యూపీ వారియర్స్, గుజరాత్ జెయింట్స్తో పాటు దిల్లీ కెపిటెల్స్.. ఈ ఐదు జట్లు సమరానికి సిద్ధమయ్యాయి. ఇక మొదటి మ్యాచ్లో ముంబయి- అహ్మాదాబాద్ జట్లు తలపడనున్నాయి. మ్యాచ్ వేదికల కోసం ముంబయితో పాటు అహ్మదాబాద్, దిల్లీ, బెంగళూరు, లఖ్నవు నగరాలను ఎంపిక చేసింది బీసీసీఐ. కాగా ఈ సీజన్ మీడియా హక్కులను బీసీసీఐరూ. 951 కోట్లకు విక్రయించింది.