భారత క్రికెట్ బోర్డు బీసీసీఐకి భారీ నష్టం వాటిల్లనుంది. కేంద్ర ప్రభుత్వం పన్ను ఉపశమనం ఇవ్వకపోతే ఈ క్రికెట్ బోర్టు రూ.955 కోట్ల మేర నష్టపోనుంది. ఈ మేరకు బోర్డు ఓ నివేదికలో పేర్కొంది. అయితే వచ్చే ఏడాది అక్టోబర్-నవంబర్లో జరగనున్న పురుషుల వన్డే వరల్డ్ కప్నకు భారత్ ఆతిథ్యమివ్వనుంది. కానీ ఈ వరల్డ్ కప్ ప్రసారాల ద్వారా సమకూరే ఆదాయంపై కేంద్రం ప్రభుత్వం 21.84 శాతం పన్ను(సర్చార్జ్) విధించింది. ఇందులో కిటుకేంటంటే ఐసీసీ నిర్వహించే టోర్నీలకు ఆతిథ్య దేశం పన్ను నుంచి మినహాయింపు ఇవ్వాలి. కానీ ఈ మినహాయింపు కేంద్ర ప్రభుత్వం బీసీసీఐకి ఇవ్వలేదు.
అయితే ఇలాంటి మెగా టోర్నీలకు ప్రభుత్వం పన్ను మినహాయింపు ఇవ్వకపోవడం ఇది రెండోసారి. 2016లో భారత్లో జరిగిన వన్డే వరల్డ్ కప్లో బీసీసీఐ రూ.193 కోట్లు నష్టపోవాల్సి వచ్చింది. ఆ కేసు గురించి బీసీసీఐ ఇంకా ఐసీసీ ట్రైబ్యునల్లో పోరాటం చేస్తోంది.
"పురుషుల ఐసీసీ మెగా ఈవెంట్ అక్టోబర్-నవంబర్ 2023లో భారత్లో జరగనుంది. అయితే ఐసీసీకి పన్ను మినహాయింపు అందించాల్సిన బాధ్యత బీసీసీఐపై ఉంది. ఈ మినహాయింపు ఇవ్వడానికి కాలపరిమితిని ఐసీసీ బోర్డు 2022 మే 31 వరకు పొడిగించింది. తాత్కాలిక చర్యగా 10 శాతం పన్ను ఆర్డర్‌ను పొందవచ్చు. అయితే పన్ను మినహాయింపు కారణాల వల్ల ఐసీసీ నష్టపోయిన మొత్తాన్ని బీసీసీఐ షేర్ నుంచి ఐసీసీకి సర్దుబాటు చేస్తారనే విషయం గమనించాలి" అని బీసీసీఐ రాష్ట విభాగాలకు ఓ నివేదిక సర్క్యులేట్ అయింది. అక్టోబర్ 18న బీసీసీఐ సర్వసభ్య సమావేశానికి ముందు ఇలా జరగడం గమనార్హం.