Babar azam on India vs Pakistan: టీ20 ప్రపంచకప్లో భారత్పై పది వికెట్ల తేడాతో విజయం సాధించడం ఎప్పటికీ మరువలేమని పాకిస్థాన్ కెప్టెన్ బాబర్ అజామ్ తెలిపాడు. పీసీబీ యూట్యూబ్‌ ఛానెల్‌తో మాట్లాడుతూ.. గతేడాది తమ జట్టు సాధించిన అత్యుత్తమ విజయాల్లో ఇదొకటని గుర్తు చేసుకున్నాడు. ఈ సందర్భంగా మరోసారి తన జట్టు సభ్యులను ప్రశంసలతో ముంచెత్తాడు. ప్రపంచస్థాయి అత్యుత్తమ జట్లలో ఒకటైన భారత్‌ను ఎదుర్కోవడమంటే చాలా ఒత్తిడితో కూడుకున్నదని చెప్పాడు.
"భారత్పై విజయం సాధించడం అంటే.. మాటల్లో చెప్పలేను. గత రికార్డుల గురించి అసలు ఆలోచించలేదు. అప్పుడు (అప్పటి మ్యాచ్) ఏం చేయాలనే దానిపైనే దృష్టిపెట్టాం. మ్యాచ్‌లో మా ప్రారంభం, ముగింపును తలచుకుంటే అద్భుతం. అభిమానుల నుంచి వచ్చిన స్పందన కూడా అపూర్వం. ఇదంతా జట్టు సభ్యుల సమష్టి కృషి. మ్యాచ్‌ను గెలవగలమని నమ్మామే కానీ.. మితిమీరిన ఆత్మవిశ్వాసానికి పోలేదు" అని వివరించాడు.