T20 worldcup: సూపర్​-12లో మొదటి విజయం ఎవరిదో?

టీ20 ప్రపంచకప్​ సూపర్-12 పోటీలు నేటి (అక్టోబర్ 23) నుంచి ప్రారంభం కానున్నాయి. తొలి మ్యాచ్​లో ఆస్ట్రేలియాతో ఢీ కొట్టనుంది దక్షిణాఫ్రికా. ఈ మ్యాచ్​ మధ్యాహ్నం 3.30 గంటలకు ప్రారంభం కానుంది. కాగా, డిఫెండింగ్​ ఛాంపియన్స్​ వెస్టిండీస్​తో తలపడేందుకు సిద్ధమవుతోంది ఇంగ్లాండ్ జట్టు. ఈ పోరు రాత్రి 7.30 గంటలకు దుబాయ్​ వేదికగా జరగనుంది.

టీ20 ప్రపంచకప్‌లో (T20 world cup 2021) భాగంగా సూపర్-12 పోటీలు నేటి(అక్టోబర్‌ 23) నుంచి ప్రారంభంకానున్నాయి. అబుదాబిలోని షేక్ జావేద్ మైదానంలో​ ఆస్ట్రేలియా, దక్షిణాఫ్రికా మధ్య తొలి మ్యాచ్ జరగనుండగా.. దుబాయ్​ అంతర్జాతీయ మైదానంలో డిఫెండింగ్ ఛాంపియన్స్​ వెస్టిండీస్, ఇంగ్లాండ్ జట్లు తలపడనున్నాయి. ఈ నేపథ్యంలో ఈ జట్ల బలాలు, బలహీనతలేంటో తెలుసుకుందాం..

ఆస్ట్రేలియా X దక్షిణాఫ్రికా

టీ20 రికార్డుల్లో దక్షిణాఫ్రికా జట్టుపై పైచేయి సాధించింది ఆస్ట్రేలియా. ఇప్పటివరకూ ఇరు జట్లు 22 టీ20 మ్యాచ్​లు ఆడగా ఆసీస్ జట్టు పదమూడింటిలో గెలిచింది. దక్షిణాఫ్రికా జట్టు 8 విజయాలను తమ ఖాతాలో వేసుకుంది. వరల్డ్​ కప్​ మ్యాచ్​ల్లో ఇరు జట్లు ఒక్కసారే తలపడ్డాయి. ఆ ఒక్క మ్యాచ్​లోనూ ఆస్ట్రేలియా 8 వికెట్ల తేడాతో విజయదుందుభి మోగించింది.

ఆసీస్​ ఓపెనర్​ డేవిడ్ వార్నర్​ దక్షిణాఫ్రికా జట్టుపై అత్యధిక పరుగులు చేసిన బ్యాట్స్​మన్​గా కొనసాగుతున్నాడు. ఆ జట్టుతో ఆడిన మ్యాచ్​ల్లో వార్నర్ 457 పరుగులు చేశాడు. తర్వాత స్థానంలో ఆరోన్ ఫించ్(295) ఉన్నాడు. ప్రస్తుతం ఆస్ట్రేలియా జట్టులో గ్లెన్​ మ్యాక్స్​వెల్​, మిచెల్​ స్టార్క్​ జట్టుకు బలంగా మారనున్నారు. దక్షిణాఫ్రికా జట్టులో క్వింటన్ డికాక్(351 పరుగులు), కగిసొ రబాడ (8 వికెట్లు) కీలక ఆటగాళ్లు.

మధ్యాహ్నం 3.30 గంటలకు అబుదాబి వేదికగా ఈ మ్యాచ్ జరగనుంది.

వెస్టిండీస్ X ఇంగ్లాండ్

గత టీ20 ప్రపంచకప్​లో డిఫెండింగ్ ఛాంపియన్స్​ వెస్టిండీస్, ఇంగ్లాండ్​ జట్లు టాప్​-2 స్థానాల్లో ఉన్నప్పటికీ ఈ ప్రపంచకప్​లో వాటికి చేదు అనుభవం ఎదురైంది. ఇంగ్లాండ్ రెండు వార్మప్​ మ్యాచ్​ల్లో ఒకే మ్యాచ్​ గెలవగా, వెస్టిండీస్​ రెండు వార్మప్​ మ్యాచ్​ల్లోనూ ఓటమిపాలైంది.

ఇప్పటివరకు ఇరు జట్ల మధ్య జరిగిన టీ20 మ్యాచ్​ల్లో వెస్టిండీస్ 11-7తో ఇంగ్లాండ్​పై అధిక్యంలో ఉంది. వరల్డ్​కప్​ మ్యాచ్​ల్లో వెస్టిండీస్​ 5 సార్లు విజయం సాధించగా.. ఇంగ్లాండ్​ ఒక్కసారి కూడా గెలవకపోవడం గమనార్హం.

ఇంగ్లాండ్​పై 13 ఇన్నింగ్స్​లో 409 పరుగులు చేశాడు వెస్టిండీస్​ విధ్వంసక బ్యాట్స్​మన్ క్రిస్ గేల్. ఇంగ్లాండ్​ కెప్టెన్ ఇయాన్ మోర్గాన్ 12 ఇన్నింగ్స్​ల్లో 221 పరుగులు నమోదు చేశాడు. ఆల్​రౌండర్​ డ్వేన్ బ్రావో ఇంగ్లాండ్​తో ఆడిన 12 మ్యాచ్​ల్లో 12 వికెట్లు తీయగా.. ఇంగ్లాండ్​ ఆటగాడు అదిల్ రషీద్ 7 మ్యాచ్​ల్లోనే 11 వికెట్లు తీశాడు. ఈ మ్యాచ్​లో వీరంతా కీలక ఆటగాళ్లుగా నిలవనున్నారు.

రాత్రి 7.30 గంటలకు దుబాయ్​ వేదికగా ఈ మ్యాచ్ జరగనుంది.

ఇదీ చదవండి: