పాకిస్థాన్​ను వైట్​వాష్ చేసిన​ ఆస్ట్రేలియా- చివరి ఇన్నింగ్స్​లో వార్నర్​ హాఫ్​ సెంచరీ

AUS Vs PAK Test Series Results : పాకిస్థాన్​ను ఆస్ట్రేలియా చిత్తు చేసింది. మూడు మ్యాచ్​ల టెస్ట్​ సిరీస్​ను 3-0 తేడాతో క్లీన్​స్వీప్​ చేసింది. చివరి టెస్ట్​ మ్యాచ్​ ఆడిన ఆసీస్​ ప్లేయర్ డేవిడ్​ వార్నర్​ హాఫ్​ సెంచరీతో రాణించాడు.

AUS Vs PAK Test Series Results :పాకిస్థాన్​ను వైట్​వాష్​ చేసింది ఆస్ట్రేలియా. మూడు మ్యాచ్​ల టెస్ట్​ సిరీస్​ను 3-0 తేడాతో క్లీన్​స్వీప్​ చేసింది. సిడ్నీ వేదికగా జరిగిన చివరి టెస్టులో 8 వికెట్ల తేడాతో ఆసీస్ ఘన విజయం సాధించింది. తన కెరీర్​లో చివరి టెస్ట్​ మ్యాచ్ ఆడిన ఆసీస్ ప్లేయర్ డేవిడ్ వార్నర్ హాఫ్ (57)​ ​ సెంచరీతో రాణించాడు. రెండో ఇన్నింగ్స్​లో 130 పరుగులు లక్ష్యంతో బరిలోకి దిగిన కంగారూ జట్టు కేవలం రెండు వికెట్లు మాత్రమే కోల్పోయి టార్గెట్​ను ఛేదించింది. లబుషేన్ (62) పరుగులు చేసి ఆకట్టుకున్నాడు. అంతకుముందు 68/7 ఓవర్​ నైట్ స్కోరుతో నాలుగో రోజు ఆట ప్రారంభించింది పాకిస్థాన్. కానీ 115 పరుగులకే కుప్పకూలింది. కంగారూ బౌలర్లలో హేజిల్​వుడ్ (4), లయోన్ (3), స్టార్క్ (1), కమిన్స్ (1), హెడ్ (1) వికెట్లు తీశారు. ఫలితంగా తొలి ఇన్నింగ్స్​లో వచ్చిన 14 పరుగుల ఆధిక్యం కలుపుకుని ఆసీస్​కు 130 లక్ష్యాన్ని నిర్దేశించింది పాక్.

మూడో టెస్ట్​ సాగిందిలా

• పాకిస్థాన్​ తొలి ఇన్నింగ్స్: 313-10 (77.1 ఓవర్లు)
• ఆస్ట్రేలియా తొలి ఇన్నింగ్స్ : 299-10 (109.4 ఓవర్లు)
• పాకిస్థాన్​ రెండో ఇన్నింగ్స్ : 115-10 (43.1 ఓవర్లు)
• ఆస్ట్రేలియా రెండో ఇన్నింగ్స్: 130-2 (25.5 ఓవర్లు)

టెస్టులకు డేవిడ్ వార్నర్ వీడ్కోలు
David Warner Last Test Match :తన కెరీర్​లో చివరి టెస్ట్ ఆడిన డేవిడ్​ వార్నర్​కు నాలుగ‌వ రోజు వార్న‌ర్ ఔటైన త‌ర్వాత ప్లేయ‌ర్లు, ప్రేక్ష‌కులు ఘనంగా వీడ్కోలు ప‌లికారు. అనంతరం త‌న హెల్మెట్‌ను, గ్లౌవ్స్‌ను ఓ చిన్నారి అభిమానికి గిఫ్ట్‌గా ఇచ్చాడు వార్నర్. మైదానంలో ఉన్న త‌న కూతుళ్ల‌కు హ‌త్తుకున్నాడు భాగోద్వేగానికి గురయ్యాడు. కన్నీళ్ల‌ను తుడుచుకుంటూ అభిమానుల‌కు అభివాదం చేశాడు.

ఐదో బ్యాటర్​గా వార్నర్
టెస్టు కెరీర్‌లో అత్య‌ధిక ప‌రుగులు చేసిన ఐదో ఆస్ట్రేలియా బ్యాట‌ర్‌గా వార్న‌ర్‌ నిలిచాడు. 2011 డిసెంబర్​లో న్యూజిలాండ్​తో జరిగిన మ్యాచ్​తో టెస్టుల్లోకి అరంగేట్రం చేసిన డేవిడ్ వార్నర్ ఇప్పటివరకు 112 మ్యాచ్​లు ఆడాడు. దాదాపు 13 ఏళ్ల టెస్ట్​ కెరీర్​లో 205 ఇన్నింగ్స్​ల్లో 44.59 సగటు, 70.19 స్ట్రైక్​ రేట్​తో 8,786 పరుగులు చేశాడు. ఇందులో 26 సెంచరీలు, 37 అర్ధ సెంచరీలు ఉన్నాయి. పాకిస్థాన్​పై 335* అత్యధిక వ్యక్తిగత స్కోరు నమోదు చేశాడు వార్నర్.