Asian Games Cricket 2023 : తిలక్​ అదరహో.. ఫైనల్​కు టీమ్​ఇండియా.. పతకం పక్కా..

Asian Games Cricket 2023 : 2023 ఆసియా గేమ్స్ క్రికెట్ విభాగంలో శుక్రవారం జరిగిన సెమీస్​లో భారత్ 9 వికెట్ల తేడాతో గెలుపొందింది. దీంతో పతకం ఫిక్స్​ చేసుకుంది.

Asian Games Cricket 2023 :2023 ఆసియా గేమ్స్​లో క్రికెట్ సెమీఫైనల్​ 1లో బంగ్లాదేశ్​పై భారత్ తొమ్మిది వికెట్ల తేడాతో ఘన విజయం సాధించింది. బంగ్లా నిర్దేశించిన 97 పరుగుల స్వల్ప లక్ష్యాన్ని.. భారత్ ఒక వికెట్ కోల్పోయి ఓవర్లలో 9.2 ఛేదించింది. తిలక్ వర్మ (55* పరుగులు : 26 బంతుల్లో, 2x4, 6x6) తుఫాన్ ఇన్నింగ్స్​తో అర్ధ సెంచరీ పూర్తి చేయగా.. కెప్టెన్ రుతురాజ్ గైక్వాడ్ (40* పరుగులు : 26 బంతుల్లో) రాణించాడు. బంగ్లా బౌలర్లలో రిపోన్ మోండల్ (26/1) ఒక వికెట్ దక్కించుకున్నాడు. ఈ విజయంతో భారత్ ఓ పతకం ఖాయం చేసుకుంది. ఇక శుక్రవారం రెండో సెమీఫైనల్స్​లో పాకిస్థాన్-అఫ్గానిస్థాన్ తలపడనున్నాయి. ఇందులో విజేతతో భారత్.. శనివారం గోల్డ్​మెడల్ కోసం పోటీ పడనుంది.

జైశ్వాల్ డకౌట్.. గత మ్యాచ్​లో నేపాల్‌పై సెంచరీ సాధించిన యంగ్​స్టార్ యశస్వి జైస్వాల్.. ఈసారి పరుగుల ఖాతా తెరవకుండానే పెవిలియన్ బాట పట్టాడు. అతడు తొలి ఓవర్లోనే.. క్యాచ్​ ఔటయ్యాడు. తర్వాత క్రీజులోకి వచ్చిన తెలుగు తేజం తిలక్ వర్మ.. బంగ్లా బౌలర్లను ఓ ఆట ఆడేసుకున్నాడు. తిలక్ హాఫ్ సెంచరీలో (55).. బౌండరీల ద్వారానే 44 పరుగులు వచ్చాయంటే అతడి విధ్వంసం ఏ రేంజ్​లో సాగిందో అర్థం చేసుకోవచ్చును. మరోవైపు అతడికి రుతురాజ్ తోడయ్యాడు. వీరిద్దరూ స్కోర్ బోర్డును జెట్ స్పీడ్​లో పరుగులు పెట్టించారు.

అంతకుముందు బంగ్లాదేశ్ ఇన్నింగ్స్​లో భారత బౌలర్లు పూర్తి ఆధిపత్యం సంపాదించారు. అర్ష్‌దీప్‌ ఒక్కడినే ప్రధాన పేసర్‌గా తీసుకున్నప్పటికీ స్పిన్నర్లు సాయి కిశోర్ (3/12), వాషింగ్టన్ సుందర్ (2/15) కట్టుదిట్టంగా బౌలింగ్‌ వేశారు. వారిద్దరితోపాటు షహబాజ్, రవి బిష్ణోయ్, తిలక్‌ వర్మ, అర్ష్‌దీప్‌ తలో వికెట్‌ తీశారు. దీంతో బంగ్లా ఏ దశలోనూ కోలుకోలేకపోయింది. ఇక బంగ్లా 20 ఓవర్లకు తొమ్మిది వికెట్లు కోల్పోయి 96 పరుగులు చేయగలిగింది. ఓపెనర్ పర్వేజ్‌ (23)తోపాటు లోయర్‌ ఆర్డర్‌లో జాకెర్ అలీ (24*), రకీబుల్ (14) మాత్రమే రెండంకెల స్కోరు చేశారు.