Asia Cup 2022 IND vs PAK ఆసియా కప్ 2022లో భాగంగా యూఏఈ వేదికగా మరి కొన్ని గంటల్లో భారత్ పాకిస్థాన్ మధ్య మ్యాచ్ ప్రారంభంకానుంది. దుబాయ్ ఇంటర్నేషనల్ క్రికెట్ స్టేడియంలో రాత్రి 7.30 గంటలకు మ్యాచ్ మొదలుకానుంది. గతంలో ఈ రెండు జట్లు ఆసియాకప్లో 14 సార్లు తలపడ్డాయి. 50 ఓవర్ల ఫార్మాట్లో 13 మ్యాచ్‌లు జరగగా, టీ20 ఫార్మాట్లో ఓ మ్యాచ్ జరిగింది. ఈ మ్యాచ్‌లన్నింటిలో జరిగిన ఆసక్తికరమైన విషయాలను తెలుసుకుందాం.
- పాకిస్థాన్ చివరిసారిగా మార్చి 2014లో భారత్‌పై ఆసియా కప్‌ను గెలుచుకుంది. ఈ మ్యాచ్‌లో పాకిస్థాన్ మరో రెండు బంతులు మిగిలి ఉండగానే ఓ వికెట్ తేడాతో విజయం సాధించింది. అశ్విన్ వేసిన ఓవర్లో షాహిద్ అఫ్రిది రెండు సిక్సర్లు బాది పాక్ జట్టుకు విజయాన్ని అందించాడు.
- 2016, ఫిబ్రవరి 27 జరిగిన మ్యాచ్‌లో పాకిస్థాన్ జట్టు భారత్‌పై కేవలం 83 పరుగులకే ఆలౌట్ అయింది. ఆసియా కప్లో భారత్‌పై పాక్ జట్టు సాధించిన కనిష్ట స్కోరు ఇదే.
- ఆసియా కప్లో భారత్‌పై పాకిస్థాన్ ఇప్పటివరకు 300+ పరుగులు చేసింది. పాకిస్థాన్ జట్టు అత్యధిక స్కోరు 329 పరుగులు. ఈ స్కోర్లు వన్డే ఫార్మాట్లో నమోదయ్యాయి.
- ఆసియా కప్లో పాకిస్థాన్‌తో జరిగిన చివరి మూడు మ్యాచ్‌ల్లో భారత్ విజయం సాధించింది. 2016 ఫిబ్రవరిలో టీ20 ఫార్మాట్లో జరిగిన ఆసియా కప్లో భారత్ 5 వికెట్ల తేడాతో పాకిస్థాన్‌ను ఓడించింది. దీని తర్వాత సెప్టెంబర్ 2018లో జరిగిన రెండు మ్యాచ్‌లలో (వన్డే) కూడా టీమ్ఇండియానే గెలిచింది.
- విరాట్ కోహ్లీ 2012 మార్చి 18న పాకిస్థాన్‌పై 183 పరుగుల ఇన్నింగ్స్ ఆడాడు. ఆసియా కప్లో ఓ బ్యాటర్ చేసిన అత్యధిక స్కోరు ఇదే.
- 2012, మార్చి 18 భారత్‌తో జరిగిన ఆసియా కప్ మ్యాచ్‌లో పాకిస్థాన్ ఓపెనర్ మహ్మద్ హఫీజ్ (105), నాసిర్ జంషెడ్ (112) తొలి వికెట్‌కు 224 పరుగుల భాగస్వామ్యం నెలకొల్పారు. ఆసియా కప్లో ఇదే అత్యధిక భాగస్వామ్యం.
- ఆసియా కప్లో 1988 అక్టోబర్ 31న పాకిస్థాన్‌పై భారత్‌కు చెందిన అర్షద్ అయూబ్ 21 పరుగులిచ్చి 5 వికెట్లు తీశాడు. ఆసియా కప్లో ఇప్పటివరకు భారత బౌలర్‌ చేసిన అత్యుత్తమ ప్రదర్శన ఇదే.
- రోహిత్ శర్మ ఇప్పటివరకు ఆసియా కప్లో పాకిస్థాన్‌పై 61.16 బ్యాటింగ్ సగటు, 92.44 స్ట్రైక్ రేట్‌తో 367 పరుగులు చేశాడు. ఆసియా కప్లో పాకిస్థాన్ జట్టుపై అత్యధిక పరుగులు చేసిన ఆటగాడిగా నిలిచాడు.
- 1995 ఏప్రిల్ 7 భారత్‌తో జరిగిన ఆసియా కప్ మ్యాచ్‌లో పాకిస్థాన్ ఆటగాడు ఆకిబ్ జావేద్ 19 పరుగులకు 5 వికెట్లు తీశాడు. ఇప్పటివరకు ఆసియాకప్లో పాక్ బౌలర్‌ చేసిన అత్యుత్తమ ప్రదర్శన ఇదే.
- ఆసియా కప్లో అక్టోబర్ 1988, ఏప్రిల్ 1995లో జరిగిన ఇండో-పాక్ మ్యాచ్‌లలో ఒక్క సిక్స్ కూడా కొట్టలేదు.