Asia Cup 2023 : ఈ ఏడాది భారత్ వేదికగా జరగనున్న వన్డే ప్రపంచ కప్నకు సన్నాహకంగా భావిస్తున్న ప్రతిష్టాత్మక ఆసియా కప్‌బుధవారం నుంచి ప్రారంభం కానుంది. పాకిస్థాన్, శ్రీలంక వేదికగా దాదాపు నాలుగు స్టేడియంలో ఆసియా కప్ మ్యాచ్‌లు జరగనున్నాయి. పాక్‌లోని ముల్తాన్‌, లాహోర్తో పాటు శ్రీలంకలో పల్లెకెల్లె, కొలొంబో స్టేడియాలు ఆతిథ్యం ఇవ్వనున్నాయి. ఇక ఈ మెగా టోర్నీ కోసం బెంగళూర్‌లో టీమ్ఇండియా ముమ్మరంగా సాధన చేసింది .
Asia Cup 2023 Schedule : మరోవైపు ఈ ఆసియాకప్‌ కోసం ఆరు దేశాలు పోటీపడనున్నాయి. ఆగస్టు 30 మధ్యాహ్నం జరగనున్న తొలి మ్యాచ్‌లో పాకిస్థాన్ - నేపాల్‌ తలపడనుండగా.. ఈ మ్యాచ్ బుధవారం మధ్యాహ్నం 3 గంటలకు ప్రారంభం కానుంది. అయితే ఇప్పటి వరకు కేవలం రెండుసార్లు టీ20 ఫార్మాట్‌లో జరిగిన ఆసియా కప్.. ఇప్పుడు మళ్లీ వన్డే ఫార్మాట్‌లో జరగనుంది.
Asia Cup 2023 Format : గతేడాది పొట్టి ఫార్మాట్‌లో జరిగిన ఆసియా కప్‌ను శ్రీలంక గెలుచుకోగా.. ఇప్పటి వరకు భారత్ అత్యధికంగా ఏడుసార్లు ఆసియాకప్‌లో విజేతగా నిలిచింది. దీంతో ఈసారి కూడా నాలుగు జట్ల నుంచి తీవ్ర పోటీ నెలకొంది. భారత్, పాకిస్థాన్‌తో పాటు శ్రీలంక, బంగ్లాదేశ్ ఈ రేసులో ఉన్నాయి. వన్డే ప్రపంచకప్‌ నేపథ్యంలో ప్రతి జట్టూ తమ శక్తిసామర్థ్యాలను పరీక్షించుకునేందుకు ఇదొక వేదికగా మార్చుకొనే అవకాశాలు కనిపిస్తున్నాయి.