చెత్త పడేసినందుకు జడేజాకు జరిమానా

చెత్త పడేసినందుకు టీమ్ఇండియా మాజీ క్రికెటర్ అజయ్ జడేజాపై జరిమానా విధించారు గోవాలోని ఓ గ్రామ ప్రజలు. ఎలాంటి సెలబ్రిటీ అయినా పారిశుద్ధ్య నిబంధనలు పాటించాల్సిందేనని ఆ గ్రామ సర్పంచ్ స్పష్టం చేశారు.

గోవాలో విలాసవంతమైన భవనాన్ని కొనుగోలు చేశారు టీమ్ఇండియా మాజీ క్రికెటర్ అజయ్ జడేజా. నార్త్ గోవాలోని అల్డోనా గ్రామంలో ఈ ఇల్లు ఉంది. ప్రస్తుతం అక్కడే ఉంటున్నారు. తాజాగా జడేజా ఐదు వేల జరిమానా కట్టారు. అందుకు కారణం పక్కనే ఉన్న నచినోలా అనే గ్రామంలో చెత్త పడేయడమే. ఈ విషయాన్ని ఆ గ్రామ సర్పంచ్​ వెల్లడించారు.

"కొందరు బయట వ్యక్తులు మా గ్రామంలో చెత్త వేస్తున్నారు. ఇలాంటి వారిని గుర్తించడానికి కొందరు యువకుల్ని నియమించాం. వారు ఆ బ్యాగ్​లను స్కాన్ చేసి ఆ వ్యక్తులు ఎవరో తెలుసుకుంటారు. ఈ క్రమంలోనే ఓ బ్యాగ్​పై అజయ్ జడేజా పేరుతో బిల్ పేపర్ గమనించాం. మరోసారి చెత్త వేయొద్దని హెచ్చరించాం. అతడు తన తప్పును ఒప్పుకొన్ని జరిమానా కట్టాడు. అతడిలాంటి పాపులర్ క్రికెటర్​ ఇక్కడ ఉంటుంనందుకు ఎంతో గర్వంగా ఉంది. అయితే ఎంతటి సెలబ్రిటీ అయినా పారిశుద్ధ్య నిబంధనలు పాటించాల్సిందే" అని తెలిపారు సర్పంచ్ తృప్తి బండోద్కర్.

గోవాలోని అల్డోనా విలేజ్​ చాలామంది సెలబ్రిటీస్​కు సెకండ్ హోమ్​గా ఉంటోంది. జడేజా, అమితావ్ ఘోష్​తో పాటు మరికొందరు అక్కడే భవనాలు కొనుగోలు చేసి ప్రకృతిని ఆస్వాదిస్తూ విలాసవంతమైన జీవితం గడుపుతున్నారు.