Eng vs Nz first test: న్యూజిలాండ్, ఇంగ్లాండ్ మధ్య తొలి టెస్టు రసవత్తరంగా మొదలైంది. మంచి ఆరంభాన్ని ఇంగ్లిష్ జట్టు వృథా చేసుకుంది. గురువారం లార్డ్స్‌లో ప్రారంభమైన మ్యాచ్లో అరంగేట్ర పేసర్‌ మాథ్యూ పాట్స్తో (4/13) పాటు అండర్సన్‌ (4/66) చెలరేగడంతో తొలి ఇన్నింగ్స్‌లో కివీస్ 132 పరుగులకే కుప్పకూలింది. గ్రాండ్‌హోమ్‌ (42 నాటౌట్‌) నిలబడకపోయింటే ఆ జట్టు పరిస్థితి మరింత దారుణంగా ఉండేది.
అనంతరం తొలి ఇన్నింగ్స్‌ ఆరంభించిన ఇంగ్లాండ్‌కు ఓపెనర్లు లీస్‌ (25), క్రాలీ (43) అదిరే ఆరంభం ఇచ్చారు. 59 పరుగుల వద్ద తొలి వికెట్ కోల్పోయిన అనంతరం మిగతా బ్యాటర్లంతా పెవిలియన్కు క్యూ కట్టారు. తొలి రోజు ఆట ముగిసే సమయానికి ఆ జట్టు 116 పరుగులకే 7 వికెట్లు కోల్పోయింది. కివీస్ బౌలర్లలో జేమీసన్‌ (2/20), బౌల్ట్‌ (2/15), సౌథీ (2/40) ఇంగ్లాండ్‌ను దెబ్బతీశారు. ఆట ముగిసే సమయానికి బెన్ ఫోక్స్‌ (6), బ్రాడ్‌ (4) క్రీజులో ఉన్నారు.