Abu Dhabi T10 League No Ball :అబుదాబి టీ10 లీగ్ మ్యాచ్లో వింత నో బాల్ సంధించాడు బౌలర్ అభిమన్యూ మిథున్. దుబాయ్ వేదికగా జరుగుతున్న ఈ టోర్నీలో లీగ్ మ్యాచ్లో భాగంగా శనివారం చెన్నై బ్రేవ్స్ - నార్తర్న్ వారియర్స్ జట్లు తలపడ్డాయి. ఈ మ్యాచ్లో నార్తర్న్ పేసర్ ఆభిమన్యు.. 5వ ఓవర్ బౌలింగ్ చేశాడు.
ఈ ఓవర్లో మూడో బంతిని సంధించే క్రమంలో.. అతడి అడుగు లైన్ దాటి ముందుకు పడింది. దీంతో ఈ బంతిని ఫీల్డ్ అంపైర్ నో బాల్గా ప్రకటించాడు. అయితే రిప్లైలో చూడగా.. అతడి ఫుట్కు, లైన్కు ఉన్న దూరం చూసి అందరూ షాక్కు గురయ్యారు. అతడి అడుగు దాదాపు రెండు ఫీట్ల దూరం పడింది. ఈ వీడియో చూసిన నెటిజన్లు.. క్రికెట్లో అత్యంత చెత్త నో బాల్ ఇదేనేమో అని కామెంట్లు చేస్తున్నారు. మరి మీరూ ఆ నో బాల్ వీడియో చూసేయండి.
ఇక మ్యాచ్ విషయానికొస్తే.. ఈ మ్యాచ్లో తొలుత బ్యాటింగ్ చేసిన నార్తర్న్ వారియర్స్.. నిర్ణీత 10 ఓవర్లలో 3 వికెట్లు కోల్పోయి 106 పరుగులు చేసింది. నార్తర్న్ జట్టులో హజ్రతుల్లా బజాయ్ (54 పరుగులు) హాఫ్ సెంచరీ సాధించాడు. అనంతరం 107 పరుగుల లక్ష్యంతో బరిలోకి దిగిన చెన్నై బ్రేవ్స్.. 9.4 ఓవర్లలో 5 వికెట్లు కోల్పోయి ఛేదించింది. బ్రేవ్స్ జట్టులో సికిందర్ రజా (27 పరుగులు, 10 బంతుల్లో)కు 'మ్యాన్ ఆఫ్ ది మ్యాచ్' అవార్డు దక్కింది. ఈ మ్యాచ్లో అభిమన్యూ మిథున్ రెండు ఓవర్లు బౌలింగ్ చేశాడు. అతడు రెండు ఓవర్లలో 5.50 ఎకనమీతో 11 పరుగులిచ్చి 2 వికెట్లు పడగొట్టాడు.