భారత బ్యాడ్మింటన్ స్టార్లు సైనా నెహ్వాల్, కిదాంబి శ్రీకాంత్లకు ప్రతిష్ఠాత్మక టోక్యో ఒలింపిక్స్లో పాల్గొనే అవకాశాలు సన్నగిల్లుతున్నాయి. స్విస్ ఓపెన్ ఓటమితో సైనా, శ్రీకాంత్ల ఒలింపిక్ అవకాశాలు మరింత సంక్లిష్టమయ్యాయి. మెగా ఈవెంట్కు ముందు మరో ఐదు అర్హత టోర్నీలు మాత్రమే ఉన్నాయి. వీటిల్లో మంచి ప్రదర్శన చేస్తేనే ఈ ఇద్దరికీ ఒలింపిక్స్లో స్థానం దక్కుతుంది.
2012 లండన్ ఒలింపిక్స్ కాంస్య పతక విజేత సైనా నెహ్వాల్.. ప్రస్తుతం 19వ ర్యాంక్లో ఉంది. ఈ ఏడాది ప్రారంభంలో జరిగిన స్విస్ ఓపెన్లో తొలి రౌండ్లోనే నిష్క్రమించింది ఈ షట్లర్. దీంతో ఒలింపిక్స్ అవకాశాలను మరింత సంక్లిష్టం చేసుకుంది. రానున్న టోర్నీల్లో మంచి ప్రదర్శన చేసి 16వ ర్యాంక్కు చేరితే సైనాకు ఒలింపిక్ బెర్తు దక్కుతుంది. లేకపోతే కష్టమనే చెప్పాలి. ఆమె టాప్ 10లోకి వచ్చే అవకాశమైతే లేనప్పటికీ.. టాప్ 10లో ఉన్న ఆశావాహులను రానున్న టోర్నీల్లో ఓడించడం ద్వారా సైనా అవకాశాలను మెరుగు చేసుకోవచ్చు. ఇప్పటికే ఈ విభాగంలో పీవీ సింధు ఒలింపిక్స్కు అర్హత సాధించింది.
మాజీ నంబర్1 ఆటగాడు కిదాంబి శ్రీకాంత్.. గత రెండేళ్లుగా గడ్డు పరిస్థితులు ఎదుర్కొంటున్నాడు. స్విస్ ఓపెన్లో సెమీస్ వరకు వెళ్లిన అతడు విక్టోర్ అక్సెల్సన్ చేతిలో పరాజయం పాలయ్యాడు. ప్రస్తుతం 13వ ర్యాంకులో కొనసాగుతున్న కిదాంబి.. రానున్న టోర్నీల్లో తన ర్యాంకును కాపాడుకుంటే మెగా ఈవెంట్లో పాల్గొనడానికి మెరుగైన అవకాశాలు ఉంటాయి. ఇతనికి మరో సింగిల్స్ ఆటగాడు సాయి ప్రణీత్ నుంచి పోటీ ఉంది. 2019 వరల్డ్ ఛాంపియన్షిప్స్లో కాంస్య విజేత ప్రణీత్.. బాసెల్లో జరిగిన టోర్నీలో క్వార్టర్ ఫైనల్కు చేరాడు. ప్రస్తుతం 16వ ర్యాంక్లో కొనసాగుతున్నాడు.