లఖ్‌నవూ వేదికగా జరుగుతున్న సయ్యద్ మోదీ అంతర్జాతీయ బ్యాడ్మింటన్ టోర్నీలో కిదాంబి శ్రీకాంత్, సౌరభ్‌వర్మ క్వార్టర్ ఫైనల్లోకి దూసుకెళ్లారు. గురువారం జరిగిన పురుషుల సింగిల్స్‌ ప్రిక్వార్టర్స్‌లో మూడో సీడ్‌ శ్రీకాంత్ 18-21, 22-20, 21-16తో పారుపల్లి కశ్యప్‌పై, సౌరభ్‌వర్మ 21-11, 21-18తో ఆలాప్‌ మిశ్రాపై విజయం సాధించారు.
సౌరభ్ వర్మ శుక్రవారం(నవంబర్ 29న) జరగనున్న మ్యాచ్లో విటిడ్ సర్న్(థాయిలాండ్)తో తలపడనున్నాడు. ఇది మధ్యాహ్నం 2:30 గంటలకు ప్రారంభం కానుంది. శ్రీకాంత్... వాన్ హో(కొరియా)తో పోటీపడనున్నాడు. ఈ మ్యాచ్ 5 గంటలకు జరగనుంది.
నలుగురు ఓటమి...
నాలుగో సీడ్‌ సాయిప్రణీత్‌... కున్లవుత్‌ (థాయ్‌లాండ్‌) చేతిలో ఓడిపోయాడు. వరుస సెట్లలో 11-21, 17-21తో పరాజయం చెందాడు. లక్ష్యసేన్ 14-21, 17-21 తేడాతో సాన్‌ వాన్ (కొరియా) చేతిలో ఖంగుతిన్నాడు.
లక్ష్యసేన్, సాయి ప్రణీత్ సిరిల్‌వర్మ 9-21, 22-24 తేడాతో వాంగ్‌ హి (కొరియా) చేతిలో, అజయ్‌ జయరాం 18-21, 21-14, 28-30 తేడాతో జున్‌ పెంగ్‌ (చైనా) చేతిలో ఓడిపోయి ప్రిక్వార్టర్స్లోనే ఇంటిముఖం పట్టారు.
మహిళలు, మిక్స్డ్లో...
మహిళల సింగిల్స్‌ ప్రిక్వార్టర్స్‌లో గెలిచి రితుపర్ణ దాస్‌ క్వార్టర్స్ చేరుకుంది. వరుస సెట్లలో 16-21, 13-21 తేడాతో తన్వి లాడ్‌పై నెగ్గింది. మిక్స్‌డ్‌ డబుల్స్‌ ప్రిక్వార్టర్స్‌లో ప్రణవ్‌ చోప్రా- సిక్కిరెడ్డి జోడీ 12-21, 21-18, 13-21 తేడాతో సీడెల్‌- లిండా (జర్మనీ) ద్వయం చేతిలో ఓటమిపాలైంది. మహిళల డబుల్స్‌ ప్రిక్వార్టర్స్‌లో సిక్కిరెడ్డి- అశ్విని పొన్నప్ప కోల్‌- లారెన్‌ (ఇంగ్లాండ్‌)తో జరిగిన మ్యాచ్లో రిటైర్డ్‌ హర్ట్గా వెనుదిరిగారు.
