మళ్లీ ఓడిన సింధు, శ్రీకాంత్- నాకౌట్​ కష్టమే!

ప్రపంచ బ్మాడ్మింటన్​ సమాఖ్య (బీడబ్ల్యూఎఫ్) వరల్డ్​ టూర్​ ఫైనల్స్​లో భారత షట్లర్లకు మరోసారి నిరాశ తప్పలేదు. గురువారం జరిగిన గ్రూప్​ దశ రెండో మ్యాచ్​లో పీవీ సింధు, శ్రీకాంత్​ ఓటమి పాలయ్యారు. దీంతో నాకౌట్​ చేరడం దాదాపు అసాధ్యంగా మారింది.

బీడబ్ల్యూఎఫ్ వరల్డ్​ టూర్​ ఫైనల్స్​(డబ్ల్యూటీఎఫ్ )లో వరుస ఓటములు చవిచూశారు భారత షట్లర్లు పీవీ సింధు, కిదాంబి శ్రీకాంత్. గురువారం జరిగిన గ్రూప్ దశ రెండో మ్యాచ్​లో రచనోక్ చేతిలో సింధు వరుస సెట్లలో ఓడింది. తైవాన్​కు చెందిన వాంగ్​జుతో తీవ్రంగా పోరాడినప్పటికీ శ్రీకాంత్​కు ఓటమి తప్పలేదు. ఫలితంగా వరల్డ్​ టూర్​ ఫైనల్స్​లో భారత షటర్ల కథ దాదాపు ముగిసినట్లే.

బుధవారం ఆరంభ మ్యాచ్​లో ఓడిన సింధు.. రెండో మ్యాచ్​లో గట్టిగానే పోరాడింది. థాయ్​లాండ్ షట్లర్​ రచనోక్ ఇంటానాన్​తో తొలి గేమ్​లో ఓ దశలో 18-18తో సమంగా నిలిచింది. అయితే వేగంగా పుంజుకున్న ఇంటానాన్​ 21-18తో గేమ్​ను దక్కించుకుంది. ఇక రెండో గేమ్​ కూడా హోరాహోరీగా మొదలైనా.. క్రమంగా ఇంటానాన్​ పూర్తి ఆధిపత్యం ప్రదర్శించింది. ఆ సెట్​లో 21-13తో నెగ్గి మ్యాచ్​ను కైవసం చేసుకుంది. దీంతో సింధు నాకౌట్​ ఆశలపై నీళ్లు చల్లినట్లైంది.

ఇక పురుషుల సింగిల్స్ విభాగంలో రెండో గేమ్​లోనూ ఓటమి చవిచూశాడు కిదాంబి శ్రీకాంత్. వాంగ్​జు చేతిలో 21-19, 9-21,19-21తో ఓడిపోయాడు. తొలి గేమ్​లో చూపిన ఆధిపత్యం చివరి వరకు నిలబెట్టుకోలేకపోయాడు శ్రీకాంత్. రెండో సెట్​​ పూర్తిగా వాంగ్​జు చేతిలోకి వెళ్లిపోయింది. మూడో గేమ్​లో తీవ్రంగా పోరాడినప్పటికీ భారత షట్లర్​కు నిరాశ తప్పలేదు.

ఇదీ చూడండి:డబ్ల్యూటీఎఫ్​ ఆరంభ మ్యాచ్​ల్లో సింధు, శ్రీకాంత్​ ఓటమి