జకర్తా వేదికగా జరుగుతోన్న ఇండోనేసియా మాస్టర్‌ సూపర్‌ - 500 టోర్నీలో భారత స్టార్ షట్లర్ పీవీ సింధు పోరాటానికి తెరపడింది. క్వార్టర్ ఫైనల్లో జపాన్కు చెందిన సయాక టకహషియా చేతిలో ఓటమిపాలైంది.
సయాక చేతిలో 21-16, 16-21, 19-21 తేడాతో ఓడి ఇంటిముఖం పట్టింది సింధు. గంటా ఆరు నిమిషాల పాటు సాగిన ఈ పోరాటంలో మొదటి సెట్లో ఆధిపత్యం వహించిన సింధు.. మిగిలిన రెండు సెట్లలో పోరాడినా ఫలితం లేకపోయింది. ఇదే క్రీడాకారిణి రెండో రౌండ్లో సైనాను కూడా ఓడించింది.
సింధు ఓటమితో ఇండోనేసియా ఓపెన్లో భారత్ పోరు ముగిసింది. ఇండియా పురుష షట్లర్లు సాయి ప్రణీత్, కిదాంబి శ్రీకాంత్, సౌరభ్ వర్మ బుధవారం జరిగిన రెండో రౌండ్లోనే ఓటమి పాలయ్యారు.
గత వారం జరిగిన మలేసియా ఓపెన్లోనూ భారత షట్లర్లు విఫలమయ్యారు. ఈ టోర్నీలో పురుషు షట్లర్లు రెండో రౌండ్ దాటడానికే కష్టపడగా.. సింధు, సైనా క్వార్టర్ ఫైనల్ వరకు వెళ్లారు. గతేడాది ప్రపంచ ఛాంపియన్ షిప్ తర్వాత సింధు ఒక్క పతకం తేలేకపోయింది.
ఇవీ చూడండి.. టీమిండియా తీరు ఆశ్చర్యాన్ని కలిగించింది: అక్తర్
