ఓర్లీన్​ మాస్టర్స్:​ సెమీస్​లో సైనా.. శ్రీకాంత్ ఔట్​

భారత స్టార్​ షట్లర్​​ సైనా నెహ్వాల్​.. ఓర్లీన్​ మాస్టర్స్​ సెమీస్​లోకి దూసుకెళ్లింది. మహిళల సింగిల్స్​ క్వార్టర్స్​లో అమెరికా షట్లర్​ ఐరిస్​ వాంగ్​తో జరిగిన పోరులో 21-19, 17-21, 21-19తో గెలుపొందింది. పురుషుల సింగిల్స్​లో మాజీ నంబర్ 1 ఆటగాడు కిదాంబి శ్రీకాంత్​ క్వార్టర్స్​లో వెనుదిరిగాడు.

పారిస్​ వేదికగా జరుగుతున్న ఓర్లీన్స్​ మాస్టర్స్​లో భారత స్టార్​ షట్లర్​ సైనా నెహ్వాల్​ సెమీస్​లోకి దూసుకెళ్లింది. మహిళల సింగిల్స్​లో అమెరికా ప్లేయర్​ ఐరిస్​ వాంగ్​తో జరిగిన క్వార్టర్​ ఫైనల్స్​లో 21-19, 17-21, 21-19తో గెలుపొందింది. గత రెండేళ్లుగా ఫామ్​లేమితో తంటాలు పడుతున్న సైనా.. సెమీస్ చేరడం ఇదే తొలిసారి.

చివరిసారిగా 2019లో ఇండోనేసియా మాస్టర్స్​ 500 టోర్నీలో సెమీస్​కు చేరింది సైనా. తన తదుపరి మ్యాచ్​లో డెన్మార్క్​ షట్లర్​ క్రిస్టోఫర్సన్​తో లేదా స్వదేశానికి చెందిన ఇరా శర్మతో తలపడనుంది.

పురుషుల సింగిల్స్​లో భారత స్టార్ షట్లర్​ కిదాంబి శ్రీకాంత్​.. ఇంటిముఖం పట్టాడు. క్వార్టర్స్​లో ఫ్రాన్స్​ ప్లేయర్​ తోమ జూనియర్ పోపోవ్​.. శ్రీకాంత్​పై విజయం సాధించాడు. 41 నిమిషాల పాటు కొనసాగిన ఆటలో ప్రత్యర్థి 21-19, 21-17 తేడాతో విజయం సాధించాడు.

ప్రపంచ 8న సీడ్​, భారత మహిళల డబుల్స్​ జోడీ అశ్విని పొన్నప్ప-సిక్కి రెడ్డి.. ఇంగ్లాండ్​కు చెందిన చోలే బిర్చ్-లారెన్ స్మిత్ జంటపై విజయం సాధించింది. 21-14, 21-18 తేడాతో గెలుపొందిందీ భారత ద్వయం. తదుపరి మ్యాచ్​లో థాయ్​లాండ్​ జోడీ జోంగ్‌కోల్ఫాన్ కితితారకుల్-రవిందా ప్రజోంగ్​ను ఎదుర్కోనుంది.

పురుషుల డబుల్స్​ జోడీ క్రిష్ణ ప్రసాద్​-విష్ణు వర్ధన్.. ఫ్రాన్స్​ జంట క్రిస్టో పోపోవ్​-తోమ జూనియర్ పోపోవ్​ జంటపై విజయం సాధించింది. 21-17, 10-21, 22-20 తేడాతో గెలుపొందిన ఈ ద్వయం సెమీస్​కు అర్హత సాధించింది. తర్వాతి మ్యాచ్​లో ఇంగ్లాండ్​కు చెందిన కల్లమ్​ హమ్మింగ్-స్టీవెన్​ స్టాల్​వుడ్​ జంటతో ఆడనుంది.

ఇదీ చదవండి:'పురుషుల బౌలింగ్ ఎదుర్కోవడం వల్లే బ్యాటింగ్​ మెరుగు'