భారత బ్యాడ్మింటన్ జట్టు థాయ్​లాండ్​కు పయనం

మరికొద్ది రోజుల్లో ప్రారంభయ్యే థాయ్​లాండ్ ఓపెన్ కోసం బయల్దేరారు భారత బ్యాడ్మింటన్ క్రీడాకారులు. సైనా, సాయి ప్రణీత్, శ్రీకాంత్​తో పాటు మరికొందరు థాయ్​లాండ్ వెళ్లారు. సింధు నేరుగా లండన్ నుంచి బ్యాంకాక్ పయనం కానుంది.

భారత స్టార్ షట్లర్ సైనా నెహ్వాల్​తో పాటు ఒలింపిక్స్​లో పతకం కోసం పోటీపడుతోన్న బ్యాడ్మింటన్ క్రీడాకారులు థాయ్​లాండ్​కు బయలుదేరారు. బ్యాక్​ టూ బ్యాక్ టోర్నీల్లో పాల్గొనేందుకు వీరంతా సిద్ధమయ్యారు. సైనా నెహ్వాల్, సాయి ప్రణీత్, కిదాంబి శ్రీకాంత్​, సాత్విక్​రాజ్, చిరాగ్ శెట్టి, అశ్విని పొన్నప్ప, సిక్కి రెడ్డి థాయ్​లాండ్ వెళ్లిన వారిలో ఉన్నారు. ఒలింపిక్ రజత పతక విజేత పీవీ సింధు లండన్​ నుంచి దోహా మీదుగా బ్యాంకాక్ చేరుకోనుంది.

శ్రీకాంత్ అక్టోబర్​లో డెన్మార్క్ సూపర్-750లో పాల్గొనగా.. మిగతా వారంతా 10 నెలల తర్వాత తొలి టోర్నీలో పాల్గొనబోతున్నారు.

ప్రస్తుతం అందరి చూపూ యోనెక్స్ థాయ్​లాండ్ ఓపెన్ (జనవరి 12-17), టయోటా థాయ్​లాండ్ ఓపెన్ (జనవరి 19-24)పైనే ఉంది. కరోనా కారణంగా దాదాపు 10 నెలలు ఆటకు దూరంగా క్రీడాకారులు ఈ టోర్నీలతో ఫామ్​లోకి రావాలని ఉవ్విళ్లూరుతున్నారు.

కాగా, ప్రణయ్, పారుపల్లి కశ్యప్, సమీర్ వర్మ, ధృవ్ కపిల, మను అత్రి శనివారమే హైదరాబాద్ నుంచి బ్యాంకాక్ బయల్దేరారు.